Nimina Hnam Run chhung inkhawmah Mizo National Women Front (MNWF) pualin inkhawm neih a ni a. He hun hi B Lalawmpuii, Vice President, AMC Executive Corporator-in a kaihruai a, Khawlhmingthangi, Joint Secretary-in hunserh a hmang.
He hunah hian Zakapa Award te pawh lo dawng tawh, Mizo hmeichhe chhuanawm Dr Lalrinawmi Ralte, Tluangnuam chuan thu a sawi a. Mizo hmeichhiate dinhmun chawikang zel turin sorkar, kohhran leh society ṭanrual a ngaih thu a sawi a. Tun dinhmunah chuan an ṭangrual ṭha tawk lo nia a lan thu a sawi bawk a ni. “Mizo hmeichhiate dinhmun chawikang tura sorkar, kohhran leh khawtlang a ṭanrual theih nan hmahruaitu an awm a ngai a ni,” a ti.
Dr Lalrinawmi Ralte chuan, ram, kohhran leh khawtlang inrelbawlnaa thutlukna siamtuah hmeichhia an awm ve a ṭul tak zet tih a sawi a. “Hmeichhiate infuih tawn ila, tihrual ngai te tih rualin hmalam i pan ang u,” a ti a. Ram inrelbawlnaah hmeichhia an tel ve zauh zauh ṭhin tih a sawi a, “Kan la lut tam tawk lo a, dinhmun pawimawh kan chelh tam ve a ngai a ni,” a ti bawk.
Dr Lalrinawmi chuan, “Pathianin mamawhtute ṭanpui turin min ti a, raltlante hi theih ang angin kan pui tur a ni. Raltlan harsa tak takte la pui lo kan awm a nih chuan kan tih tur kan la ti lo a ni,” a ti a. Dr Rinawmi chuan hmeichhiate inzir fing zel a, hmalam pan zel a ngai tih sawiin, “Ram, Kohhran leh vantlang inrelbawlnaa tih puisui a, tihmasawn turin ram inrelbawlnaah kan tel tam ve zel a ngai a ni,” a ti bawk.