ZPM chuan an Party Office-ah nimin khan chhung inkhawm hun hmangin, he huna thusawitu Dr.Vanlalthlana, Education Minister chuan, “Zirtîrtu sem rual hi huai takin kan kalpui dawn a, transfer dan phung fel zawk, thingtlang lama rei tak awm tawhte leh khawpuia awm rei tawh sawnchhuah ngaite an awm. Hei hian kan zirna hi a siamtha dawn em tih ngaihtuah chungin fimkhur leh dik taka kalpui kan tum a ni,” a ti.
Dr.Vanlalthlana Minister chuan, “Kan manifesto-a mi Education Department-ah zirtîrtu sem rual (Rationalisation of Teacher) huai taka kaltlangpui kan tum a, kan thawk mek. Intih huaisen leh intihmingthat tum vanga kalpui kan ni lo va, tu pawh Minister se an tih tur a ni. Minister-te hi Party Manifesto tipuitling tura ruatte kan ni a, manifesto tihpuitlin hi kan hna a ni. Rationalisation hmangin zirtirtu transfer dan phung fel zawk, thingtlang lama rei tak awm tawhte leh khawpuia awm rei tawh sawnchhuah ngaite an awm a, hei hian kan zirna hi a siamtha dawn em tih ngaihtuah chungin fimkhur leh dik taka kalpui kan tum a ni. Education Consultant leh Education Reforms Committee kan nei a, an ruahmanna hnuaiah kum thum chhunga Education kan kalpui dan tur kan duang tawh a, zirna atangin moral reform siam kan tum bawk. Ram siamtha tur hian huaisen a ngai a, mi dawihzep tan siamthat theih a ni lo. Sawrkar hmasate a pawng a takin kan sawisel ngawt lova, thil tha tam tak min tihsak tawh tih kan sawi thin. Heti chunga sawrkar hmasate engmah ti lo leh chhe tak anga sawichhuak thina min puh fona hi a dik tawk lo. Sawisel an tulnaah kan sawisel a, fak an tul hunah kan fak mai dawn a ni. Tha ni a kan hriatah chuan huaisen takin kan kal zel dawn a, Chief Minister huaisen kan nei a, Minister te pawh kan huaisen lo thei lo. Opposition beih kan hlauh avangin kan duap dawn lova, Mizoram thatna tur hi kan ngai pawimawh zawk” a ti.
Education Minister chuan, “Hahdam tura kan thawhrim a ngai. Nakina Mizoram lo la awm tur atan kan thawk mek a, Mizoram a lo hahdam theihna turin rim takin kan thawk mek a ni. Kan manifesto zirchiang leh en chungin taima taka kan thawh a ngai a, mipuiten min tehna tur chu kan Manifesto kan ti hlawhtling em? tih a nih dawn avangin tunah chuan hahchawl hman kan ni lo. Rah tha tak lawh tur kan ching tan mek a, kan hlawhtlin hma chu kan bei zel ang. Mipuiten min beisei sang tih kan hria a, mipuite beiseina tihthlawn loh hi kan tum ber a ni. Research base-in kan kal dawn kan ti a, chutiang atan chuan India mai ni lo, India ram pawn thlenga insumdawn tawnna tur buaipuiin kei ngei pawh ka fehchhuak a, theih tawp kan chhuah reng a ni. Manifesto-a kan inzawrhna a taka chantir hi kan tum ber a ni a, bul kan tan phawt ang a, chu chu ataka kalpui kan tum mek a, engemaw harsatna avanga Manifesto tih danglam deuh a ngai a nih pawhin mipui tana tha zawk tur a nih chuan huai taka kan tih danglam a ngai a ni. Mipuite hian an tana thil tha titute chu an hai hauh lovang tih ka chiang a ni,” a ti.
Dr.Mathlana chuan, “Sawrkarin report kan neih thar berah chuan Mizoramah sawrkar school 257-ah zirlai 1,30,000 vel an awm mek a, zirtirtu 10000 vel bawr an awm mek bawk. School Education Department hnuaiah Directorate, district office, Samagra, SCERT, DIET, Adult Education leh MBSE te an awm mek a, Higher & Technical Education hnuaiah College 20 chuang awmin Polytechnic College, Hindi College, Scholarship Board bakah board hrang hrang an awm bawk. Buaipui tur hi a tam em em a, kan vawikhat sawrkarna a ni a, tihdan kan thiam tawk loh thil pawh tam tak a awm ang. Mahse sawrkar kal tawhten an tih ngam loh thil tha tak tak ti turin ke kan pen mek a, hei ringawt pawh hi kalphung thar pakhat chu a ni tawh. Sawiselna tam tak kan tawk chho a, kan insiamthatna tur pawh a awm ang. Thil tha a nih chuan huai taka din tlang kan tum zel dawn a ni,” a ti bawk.
An party chhung inkhawmah hi TBC Lalthanmawia, General Secretary, Media, IT & Publicity Dept. chuan kaihruaiin Lalmuanpuia Punte, Adviser to Chief Minister chuan Zampui tlangdunga Phuldungsei khua an zinna report a pe a, Prof.Lalnilawma, Minister of State leh Lalnghinglova Hmar, Minister of State bakah MLA thenkhatten party chhung inkhawm hi an hmanpui bawk.