- Mahmuaka Chhakchhuak
Pathianthuah ‘Mihring tawngte leh vantirhkoh tawngtein thu sawi thei mah ila, hmangaihna ka neih si loh chuan, dar ri ang emaw, darbenthek ri ang emaw chauh ka ni ang (I Kor. 13;1) tih thu kan hmu a. Hei lo ziak hi hmundangah pawh chhiar tur awm tho mahsela heti chin atang ringawt pawh hian hmangaihna ropui zia leh chungnun zia chu kan hrethiam thei thoin a rinawm.
Pathianthu lam tel hauh lo pawhin Lalhmingliana Saiawi chuan heti hian hmangaihna ropui zia alo sawi tawh bawk a; Nulate hian engtin chiah nge min sawi ve thin ka hre lo a; keini tlangvalho chuan nula nikhua lo deuh chanchinte kan han sawichhuah chang hi chuan, nulaho that zia leh an telloa kan awm theih loh ziate hi hre chang hauh loin, ‘Hmeichhia zawng an rinawm loh em! A bum thiam thiamin an bum mai a. Hmangaihna tak tak an nei lo. Min hmangaih takzet emaw kan tihte pawh hi kan aia tha an hmuh chuan min duh lo leh mai a ni’ kan ti bai bai thin. Mi titi atanga kan lo hriat danin thang bosan dawn zana ngaihzawng rinawm takin ‘I lo hawn leh hunah zawng keini aia tha i hmu ang a, min duh tawh lo ang a, mahse, kei zawng min duh tawh lo mahla ka lo nghak reng reng ang che. Mi pakhat tan ka piang a, chu chu nangmah i ni, nangin min duh loh chuan pasal ka nei lo mai ang. Midang tan ka piang si lo, i awm loh hlana ka lo rinawm loh emaw pasal ka lo neih emaw chuan sakei seh’ tingata min han thlah pawh hi kum khat vel emaw han thang bosan chuan an lo rai emaw tlangval an lo luhkhung emaw te a lo ni daih thin a; sakei lah chuan seh ta’nge a ti lem hlei lo a. Chu chu dik chiah kher lo mahse han sawikhawm nikhua hian hmangaihna dik chu vang kan ti hle. Hmeichhia pawhin in ti ve tho ang.
A ni taka hmeichhe tam tak hmangaihna hi chu a sumdawng rilru viau mai a, a neinung leh tinuam thei tur apiang hi chu an hmangaih thei mai a,an ngei zawng tak pa thle ngei nguai, pa ti thawt thawt emaw pathlawi lehnghalte emaw te pawh an neih leh dinhmuntein a tlin phawt chuan an duh chawp mai thin. Chu chu hmangaihna dik tih ngam a har viau ang. Nawmsakna an hmangaih mai mai a ni a, a tlangvala kha hmangaih kan ti thei lo ang tia hmangaihna chu demawm lek lek anga a han sawi hnuah chuan chutiang mihring hmangaihna reng reng hi chhan nei vek a nih avang chuan hmangaihna chu kan ngainep dawn ta em ni ang? Hnai lo ve, eng emaw vang mai maia kan inhmangaih thei tak hi hmangaihna ropui chu a ni. Chhan neia inhmangaih kan nih avang tak hian hmangaihna da mai tur pawh kan tinung leh thei a, hmangaihna tlem te pawh a puntir theih a, a tul hunah chuan awm lo ata kan siam chawp thei ta zawk a ni tia sawiin a tawpah chuan Engvang pawhin inhmangaih ila, a chhan chu ho viau mah sela, hmangaihna chu dam chhung a daih dawn phawt chuan hmangaihna dik a ni mai tiin a sawi chhunzawm leh a.
Helai thu aia hmangaihna chungchang sawichianna leh sawifiahna hi a awm leh tawh chuang kherin a rinawm loh a, a fiah tawk hle mai. Damchhung daih loh hmangaihna chuan hlutna a nei lo a, hmangaihna hlutna chhan ber pawh damchhung a daih vang a ni tiin sawi ila kan sawi sual kher awm lo e.
Hmangaihna hi chi hrang hranga sawi thin a niin, thian inhmangaihna, unau inhmangaihna, Pathian hmangaihna leh ngaihzawng inhmangaihna tih tein an then thin. Heng hmangaihna chi lite hi thui tak taka sawi theih ni vek mahsela tun atan chuan ngaihzawng inhmangaihna hi han thlur bing ta ila. Ngaihzawng inhmangaihna tih hi Nulat tlangval inhmangaihna ti pawha sawi thin a ni a, keini pawhin kan sawi pawlh nawk nawk mai thei bawk. Mizo thawnthu hrang hrangahte hian nulat tlangval inhmangaihna hi sawi tur tam tak a awm a, Zawlpala leh Tualvungi inhmangaihnate, Tumchhingi leh Raldawna inhmangaihnate, Tlingi leh Ngama inhmangaihnate, Chawngmawii leh Hrangchhuana inhmangaihnate, Phira leh Ngunthanpari inhmangaihnate leh Chawngvungi leh Sawngkhara inhmangaihnate bak pawh hi sawi tur an la awm thei bawk ang.
Hmangaihna chanchin hi a ngaihnawm a, a lungchhiatthlakin a hlimawm bawk thin a. Thawnthu dangte aiin a chungnung a, a ropuina hi sawi zawh sen rual a ni lo ang. Pathianthuah bawk ‘Tin, thu hrilh theihna neiin, thuruk zawng zawng leh hriatna zawng zawng hre vek mah ila, tlang sawn theihna khawp hial rinna famkim nei mah ila, hmangaihna ka neih si loh chuan engmah ka ni lo ang. Tin, mi rethei chawmna’n ka sum zawng zawng pe vek mah ila, ka taksa pawh kang turin inpe mah ila, hmangaihna ka neih si loh chuan ka tan engmah a sawt lo ang. Hmangaihnain a dawhthei a, ngil a nei bawk thin; hmangaihnain a itsik lo a; hmangaihnain a infak lo a, a uang lo a, a che mawi lo lo a, mahni hma a sial lo a, a thinur duh lo a, sual lamah a ngaihtuah lo a; fel lohnaah a lawm lo a, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin’ (I Kor. 13;2 -7) tih thu kan hmu bawk a.
Hetiang taka ropui leh hlu hmangaihna hi khawvel mihring awm tirh ata thawnthu ngaihnawm tak thlentu ala ni reng a, ala nih zel dawnin a rinawm bawk. Kum 1612 vel daih tawha Mughal lal fapa Shah Jahan leh Persian nula hmeltha Mumtaz chanchin leh Jimmy L. Changte hmangaihna kawng chhukchhote chu vawiin thlenga thawnthu ngaihnawm ala ni reng a, phuahchawp thawnthu lamah pawh Romeo and Juliet leh Thelma leh Phillip Errington inhmangaihna chanchin ngei pawh thawnthu ngaihnawm ber berte an la ni reng bawk. Hetiang taka ropui leh hlu hi alo nih chuan a neitu tan chuan ava hlu dawn tehreng em. Chu ai mah chuan hmangaihna vulh liantu leh tithanglian a, chawm liantu chu ava vannei dawn tak em tih loh rual a ni lo. A lehlamah hmangaihna tiretheitu leh duat nachang hrelotu chuan nun khaw nawmni a nei ngai mawlh hek lo ang.