London club lian Chelsea chuan Atletico Madrid atanga Joao Felix lak tumin hma an la chhunzawm zel a, a hma aiin an hnaih zual hretin Atletico Madrid nen hian a thuphungin inremna an nei thei tawh. Felix an la lut a nih chuan Chelsea hian Gallagher chu Atletico Madrid lamah an chhuahtir a rinawm.
Portugal forward Joao Felix hian kum 2022-23 chhung khan Chelsea hi loan in a lo zawm tawh a, inelna hrang hrangah vawi 20 khelin, goal li a thun. An hnena lo khel tawh Felix hi Blues hian lak nawn leh an duh a, Atletico Madrid nen inremna an nei mai thei lo. Inremna neih an harsat chungin an indawr zui zel a, a thuphungin inremna an nei thei tawh niin tarlan a ni. Chelsea hian Felix manah engzat nge an sen dawn tih tarlan a ni lo naa, kum ruk daih contract an ziahpui dawn niin tarlan a ni thung.
Felix-a’n Stamford Bridge a pan ngei dawn nia a lan laiin England midfielder Conor Gallagher tan Stamford Bridge chhuahsan theihna kawng a inhawng zau leh zual thung. Gallagher hian La Liga club lian Atletico Madrid hi a zawm fel teuh hman viau a, a zinchhuah tawh hial hnuin a indawrna a tlawlh leh. London lamah kir leh tawh mah se Chelsea tana a khepuite kiangah training a la nei ve lova, Cobham training ground lamah a mahin training a nei chhunzawm. Blues in Felix an lak rualin Gallagher hian Atletico Madrid a pan ve thung ang. Atletico Madrid hian Gallagher hi kum nga daih contract an ziahpui dawn niin tarlan a ni.
Season liam taah beisei phak lo, season thara an match hmasa bera tlawm nghal bawk Chelsea hian forward thar lak tumin hma an la la reng. Blues hian Napoli striker Victor Osimhen lak an tum chhunzawm zel a, nipui bazar khar hma ngeia Osimhen la turin an player neihsa an hralh hmasak zet a ngai thung. Season liam taah loan a an chhuahtir Romelu Lukaku chu hralh an tum langsar a ni a, Belgium forward Lukaku hi Napoli in an lak a rinawm a, Chelsea nen an indawr mek. Napoli chuan Lukaku hi £25.5m senga lak ngheh theih turin loan a hawh phawt an duh a. Hetihlai hian Chelsea chuan Lukaku manah hian £35m an chhiar ve thung.