Nimin khan MZP chuan an pisa puiah executive committee neiin, Borapansury khuaa Mizo-in Chakma kut an tawrh chungchangte, Inter High School quiz chungchang leh MZP Assembly 2024 thupui leh Agenda lutte thlitfimna an nei.
MZP meeting chuan, Chakma khua Borapansury-a Mizo Police pahnih ten Chakma Nuho (Mohila) kut an tawrh chungchang a ngaihtuah a. Mizoram chhung ngeiah Mizoram Police te an him lo leh kut an tuar ta mai hi MZP chuan hriatthiam har a ti hle a. A dem takzet a ni. Meeting chuan, Mizo Police kut thlaktute zawng chhuaka case siam sak turin Sawrkar a ngen a. Pawi khawihtute case siamsak an nih hma chuan Chakma te an sahim nan pawn chhuak lo turin an hriattir nghal bawk.
Meeting chuan kum 2010 atanga MZP-in kumtin a buatsaih, MZP Inter High School Quiz buatsaih leh nise a ti a. Organising Committee pawh ruat nghal a ni. Quiz a tel ṭhin zawng zawngte lo inbuatsaih lawk turin MZP chuan a ngen nghal.
Kum 2024 MZP Assembly, Tlangsam Champhai a neih turah Assembly thupui atan, “Ram leh Hnam tan— Mizo zirlaite” tih a thlang a. Heng a hnuaia tarlante hi Assembly vawi 68-naa rel atan chhawpchhuah nise a ti bawk:-
- Mizoram zirnain hma a sawn theih na tur atan, Directorate of School Education hi Elementary leh Secondary-ah then anih theih nan MZP in hma la rawh se.
- Zofa hnam hrang hrang Zirlai pawlte nen kan thawhhona a that zawk theih nan, “Students’ Leaders Meet” neih ni rawh se.
- Zofa hmun hrang hranga awm te’n, inpumkhatna nghet zawk kan neih theih nan MZP-in hma la chhunzawm zel rawh se.
- Mizoram chhunga inkal pawhna kawngpui sialtu, NHIDCL ten tha zawka hna an thawh theih nan MZP-in hma la rawh se.
- Mizoram Schedule Tribe List ennawn a nih theih nan MZP-in hma la rawh se.
- Sawrkar hnathawk mahni nihna in a ken tel aia tam, hamthatna la leh hmang te sawrkarin a tih tawp theih nan MZP in hma la rawh se.