Thawhtan zan khen English Premier League 2024-25 khelh chhunzawm a ni a, inkhel awmchhunah Tottenham leh Leicester City te an inhnehtawk. Spurs hian King Power Stadium-ah goal thun hmasa mah se an hmahruaina an humhim zo lo. Championship atanga kaisang Leicester City tan hian Foxes man an tih mai Jammie Vardy chuan goal pawimawh tak a thun.
King Power Stadium-a lenglut Tottenham hian bul an tan chhe lo viau a, goal thun hmasa zawkah an tang nghe nghe. Inkhel tan phat atangin an khingpuite an nawr nghal chat a, hlauhawm an siam zawn mawlh mawlh. Goal thun theihna hun tha nei bawk thin mah se Foxes si nghak Mads Hermansen an paltlang thei lo. Spurs in £65m zet senga an lak luh Dominic Solanke pawhin goal thun theihna hun tha zet mai a nei a. A club thar tan goal thun theihna remchang a neih hi Hermansen chuan a tihthlawnsak bawk.
Inkhel tir lama an hun tha neih hlah bawk mah se Tottenham hian darkar chanve an khelhtlin hmain goal an thun ta nge nge. Minute 29-naah Pedro Porro chuan fuh zetin a tauh goal a, hmahruaina goal a thun. Championship atanga kaisang Leicester City lakah goal thun hmasa zawk an nih vangin team lian zawk Tottenham tan point thum hmuh theihna kawng zau takin a inhawng. James Maddison free kick tha tak atangin goal thun theihna hun remchang nei bawk mah se Spurs hian goal an thun belh mai thei lova, 1-0 a hmahruai chungin chawlhlawk an hmang.
Chawlhlawk hnu lamah Spurs an khel tha chhunzawm a, second half tir lamah goal an thun belh teuh hle. Spurs player man to ber Solanke chuan goal thun theihna hum remchang tha zet a nei a, Hermansen a paltlang zo lo nawn leh. Solanke-a’n a hun tha a hlah hnu hian Bentacur chuan goal thun theihna hun tha a hmu zui leh a, hnaite atanga a pet nat zawh loh vangin a hun tha a hloh zui ve leh bawk.
Derthawng tak chunga an him hram hram hnuin mualneitu Leicester City in hun tha an nei a, an hun tha neih an chhawr tangkai nghal bawk. Foxes hian na takin an khingpuite an nawr let. Veilam sir atanga an cross chu na hret mah se ding lam sir atangin ball a vawrh lut nawn leh nghal zat. He ball kal hi Foxes player ropui Jamie Vardy chuan tha zetin a tauh goal a, minute 57-naah goal thunin an si phurh a sut. Vardy hian goal thun belh theihna remchang nei zui leh mah se Tottenham si nghak Vicario a paltlang zo lova, uiawm takin a hun tha neih a hlah. Leicester City nena inhmeh tawh tak Vardy hian Foexes tan vawi 307 zet khin goal 136 a thun tling tawh. Kum 37 mi Vardy hian khelmual a chhuahsan dawnin Tottenham tantute chetze hmangin a chhiah zauh a, EPL-ah vawi khat an champion tawh a, Tottenham hi an la champion ve lo tih a lantir.
Inkhel hmuhnawm zui viau mah se hun tawp thlengin goal dang a luh belh thei tawh lova, inkhel hmuhnawm takah chu 1-1 in a tawp a, team hnih ten point khat ve ve an hmu ta a ni. An mualah chak zo lo mah se Championship atanga let leh Leicester City tan Tottenham laka point an hmu hi result tha angah a ngaih theih thung ang.