Nimin khan ZPM General Headquarters Campaign Committee buatsaihin AMC Qard No.VI By Election lo awm tur atana Campaign hun kharna inkhawm chu MHIP Hall Hunthar vengah hman a ni a, B.Lalchhanzova Minister, R.Zonusanga Adviser leh H.Lalremtluanga Candidate ten thu an sawi.
B.Lalchhanzova Minister chuan thu sawiin,”ZPM party te hian danglam bikna kan neih chu Party dangte tawngkam chhe thei ang bera kan bei ve ngailo hi a ni, kan tih tum leh kan hmachhawpte kan sawi mai thin a, ZPM lemchanga Social media a thu lo post chingte hian kan hmai an ti bal thin erawh hi chu a pawi hle a ni . MNF leh Congress hi Party inbei reng leh in hal em em an ni a, mahse tunah chuan ZPM Party a lo pian tak avangin inngeih ang takin an lo awm thei ta hial hi thil lawmawm tak a ni,” a ti.
Chhanzova chuan,”Kum 1983 a Mizo mipuite tana inpe Pu Lalduhoma chu kum 40 na chiah ah Chief Minister a lo ni ta a, Pathianin kan Chief Minister a hruai dan hi a ropui ka ti a, chutianga Pathian mihriat leh a hruai mek hnung zuitu Party kan ni hi a ngaihthat thlak hlein ka hria, kan ram tan kan chief Minister hovin ke kan pen zel dawn a ni. Sorkar kal tawhte duh lovin Zoram mipuiten Kalphungthar Mipui Sorkar an din mek a, thla reilote chhung hian kan ram tan thil tha tam tak kan ti ve ta reng mai hi lawmawm ka ti hle a, AMC By- Election lo awm turah pawh hian, ZPM Party in mipuite tana rawngbawlna zauzawk leh chak zawk kan neih theih nan kan Candidate Pu H.Lalremtluanga hi in vote hlu tak lo pe theuh turin ZPM General Headquarters hmingin ka ngen che u a ni,” a ti.
R.Zonunsanga, Adviser ZPM Gen.Hqrs pawhin thu sawiin,”Ui leh Kel thlun pawlh anga sawi thin MNF leh Congress unaute chu ZPM Party naupangte beihrawn turin an lo tang dun ta a, hei hian chiang taka a entir chu ZPM Party chu beih tham leh Party lian kan lo ni ve ta reng a ni tih hi a ni,” a ti. “Congress leh MNF Party te chu an thawhhona ah rinawm tak leh nghet takin ding sela kan duh hle a, Kum tam tak zoram an lo enkawlntawhna ah zoram mipuite kan lungawi tawh lo a ni tih hriain an tihsual tam takah te Pathian hnenah leh Mipuite hnenah ngaihdam dil sela, simna thinlung nen ram rawngbawl turin an rilrute siam thar se kan duh hle a ni,” a ti bawk.
AMC By-Election atana ZPM Candidate H.Lalremtluanga pawhin thu sawiin,”ZPM Party in AMC By-Election Candidate atana min tlang chhuak hi ka lawm hle a, rawngbawlna zau zawk nei tura Pathian kohna ah ka ngai a ni,” a ti. “AMC Ward No.VI huam chhung veng hrang hrangah campaign in kan kal kual a, mipui ten ZPM Sorka beiseina sang tak an neih thu min lo hrilh thin hian chakna thar min pe thin a ni,” a ti bawk.
Rema chuan,” AMC Ward No.VI Corporator atan thlantlin ka lo nih chuan, Pathian duh dan anga mipui rawngbawl ka tum a, chu chu ka duhthusam leh ka hmathlir a ni. Harsa zawkte khawsak dan ka hmuh atang leh kan ward huam chhunga hmasawn ngaihna tam tak ka hmuhte hian chona thar min pe a, Ward No.Vi Mipuite pawhin hei hi min hriatpuia in vote hlu tak min pe turin ka ngen che u a ni,” a ti.
He hun hi ZPM General Headquarters Vice President W.Chhuanawma MLA, Campaign Committe Chairman nibawkin kaihruaiin H.Lalhmingliana’n hunserh a hmanga, ZPM General Headquarter hruaitu thahnem takin an tawiawm a ni.