Chhuak hmasaah khan Chelsea in Atletico Madrid atanga Joao Felix an lak theih tep tawh thu kan tarlang a. Tunah chuan chiang lo zawng zawng tihchian a ni ta a, Chelsea in Joao Felix an la lut a, England midfielder Conor Gallagher-a’n Atletico Madrid a pan ve thung.
Chelsea hian season liam taah loan-a an hawh tawh Felix lak nan £45m an seng a, kum sarih daih contract an ziahpui. Hetiang chena rei contract an ziahpui teh thlat hian mak tih a hlawh a, Felix- agent thluak thatzia a lantir nia ngaih a ni. Tarlan tawh angin Felix hian season liam ta khan Chelsea hi loan in a zawm a, vawi 20 khelin goal li a thun. Stamford Bridge-ah a kir leh thei tur chu lawmawm a tih thu a sawi a, a thian hluite nen inhmuh vat vata, Chelsea tan khelh thuai a chak tak zet thu a sawi.
Stamford Bridge-ah Joao Felix a luh dawn tak vangin England midfielder Conor Gallagher chuan Stamford Bridge a chhuahsan a, Atletico Madrid a zawm fel zui ve ta bawk. La Liga club lian Atletico Madrid hian Gallagher manah £33m an seng a, kum nga daih contract an ziahpui. A club thar tur Atletico Madrid hi kar kalta mai khan a zawm teuh hman viau a, thil kal fuh tawk loh a awm vangin an in la fel mai thei lova, London-ah a kir leh. A kir leh hnuin Chelsea tana a khepuite kiangah training a la nei ve lova, Cobham training ground lamah a mahin training a nei chhunzawm. Kum khat daih chauh contract a neih tawh vangin Chelsea hian free transfer-a a chhuah mai an hlau ru viau a. Man to taka an hralh theih laia hralh tumin hma an la. Mal taka a awm hnuin Atletico Madrid hi a zawm fel ve ta nge nge a ni.
Atletico Madrid midfielder thar Conor Gallagher hian kum ruk mi lek a nih laiin Chelsea a zawm. Chelsea tan hian inelna hrang hrangah vawi 90 a khel a, goal 10 a thun tawh. Chelsea tan a khelh that theih em vangin England tan a khel zui ta hial a. Spanish La Liga-ah lamah a vul zui ngei a rinawm.