Mizoram Pradesh Youth Congress Committee (MPYCC) chuan nimin khan thuchhuah siamin, Assembly Session neih mekah Mizoram Chief Minister Lalduhoma chuan RTI chhanna aiin Assembly House-a an sawi a dik zawk thu a sawi, an ti.
ZPM sorkar hma kum tam tak Officer hna lo chelh tawhte leh tuna Department tina SPIO te ring tawk lo anga ngaih theih turin Lalduhoma, Chief Minister chuan Session neih mekah thu sawiin, ZPM sorkara Minister ni tharte a ring zawk hi Congress Thalai chuan mak a tiin a hrethiam lo hle a. Sorkar hnathawkte tih mualphona leh ZPM sorkarin a hnuaia hnathawkte a rin tawk lohzia a lang chiangah a ngai a ni, an ti a.
Hmanni lawka RTI zawhna an chhanna inang lovah pawh ZPM Party mualphona tur anih dawn ai chuan an Minister te’n an enpui hnuah an duh angin an ti danglam zel dawn tihna a ni a. RTI zawhna chhanna pawh a him ta lovah Congress Thalai chuan a ngai a, pawi a tiin mak a ti hle a ni, an ti.
Sorkar Department SPIO te dikna hailan a nih a; RTI zawhna dik taka chhan a nih theihna turin ZPM Minister-te lo inrawlh ve lo turin Congress Thalai chuan ZPM sorkar a phut a. Right to Information Act-in a sawi ang ngeia dik leh fel takin, a hunah zawhna chhang tura inbuatsaih turin sorkar a ngen bawk a ni, tiin an thuchhuahah chuan an tarlang.