England tualchhunga football player chawimawina ngaihhluthlawh zinga mi Professional Footballers’ Association (PFA player of the year) dawng tur puan a ni a. Chawimawina sang pahnih lo dawng tawh Phil Foden chu chawimawna sang dawng turin thlan a ni. Chelsea tana chetha tak Cole Palmer chu rawlhar tha berah thlan a ni a. Kum 2009-10 hnu lamah English player in mipa lama chawimawina an dawn kawp lehna hmasa ber a ni.
Manchester City leh England player pawimawh Phil Foden hi season liam ta khan a khel tha viau a, City tan hian English Premier League-ah vawi 35 a khel a, goal 19 a thun. City hi EPL leh League Cup-ah a champion pui. Champions League-ah semi-final an thleng a, Real Madrid lakah uiawm takin an tlawm. FA Cup final-ah Manchester United lakah an tlawm hlauh bawk. Club tan a chet that rualin England tan pawh a chetha zui viau a, Three Lions hi Euro 2024 final a hruai thleng a, Spain lakah an vanduai thung.
EPL-ah a zawna vawi li an champion theih nan Manchester City tana thawhhlawk tak Phil Foden hi Football Writter Association (FWA) chuan Footballer of the year-ah an lo thlang tawh. Premier League player of the season 2023-24-ah thlan a ni bawk. Chawimawina dawn lamah a kut a hmui rih viau a, a player puite ngeiin EPL player tha berah an thlang zui leh zat. Foden hian EPL trophy vawi ruk a chawi tawh am EPL a vawi ruk champion thei naupang ber a ni nghe nghe.
Foden hian a player te ngeiin player tha bera an thlang chu hlu dangdai bik leh ropui danglam bik hle nia a hriat thu a sawi. Season liam ta kha atan season mak leh ropui danglam tak a ni a. Hlawhtlinna tam zawk chang tura a insawrbing chu a sawi tel bawk. Foden hian he chawimawina dawng tura rinkai zual City tana a khelhpui pahnih; Erling Haaland leh Rodri te bakah Cole Palmer, Arsenal captain Martin Odegaard leh Aston Villa player pawimawh Ollie Watkins te a khum.
Phil Foden-a’n PFA chawimawina sang ber a dawn laiin Chelsea player pawimawh Cole Palmer chu rawlthar tha berah thlan a ni ve thung.
Palmer hian Manchester City atangin Chelsea a zawm a, a ti fuh hle. Chelsea tan hian EPL-ah vawi 34 a khel a, goal 22 zet a thun. Chelsea tan a chetthat em vangin PFA young player-ah thlan a ni. He chawimawina dawng tur hian a elpui lian Bukayo Saka, Manchester United player pahnih; Kobbie Mainoo & Alejandro Garnacho, Cystal Palace player hlui Michael Olise leh Brighton rawlthar Joao Pedro te a khum.
Kum 2009-10 khan Wayne Rooney chu PFA Player of the year-ah thlan a ni a. Hemi tum hian James Milner chu PFA Young Player-ah thlan a ni bawk. Hemi hnu lama hian English player ten PFA player of the year chawimawina leh PFA Young player-ah thlan kawp an ni lo vang vang a, 2023-24-ah Phil Foden leh Cole Palmer ten chawimawina sang an dawng kawp ve leh ta nawlh a ni.
PFA team of the year-ah Arsenal leh Manchester City player an langsar hle. Player 11 zingah Arsenal leh City player pakua zet an awm a. Liverpool defender Virgil van Dijk leh Aston Villa forward Ollie Watkins te chiah Arsenal leh City player ni lo awmchhun a ni. PFA team of the year-ah Arsenal player panga ngawt an lang a. Champion team Manchester City in player pali an thawh ve bawk.
- PFA team of the year
Goalkeeper : David Raya (Arsenal)
Defenders ; William Saliba (Arsenal)
Virgil van Dijk (Liverpool)
Gabriel (Arsenal)
Kyle Walker (Manchester City)
Midfielders : Rodri (Manchester City)
Declan Rice (Arsenal)
Martin Odegaard (Arsenal)
Forwards : Erling Haaland (Manchester City)
Phil Foden (Manchester City)
Ollie Watkins (Aston Villa)