Aizawl Municipal Corporation (AMC) ward no VI by election chu nimin khan neih a ni a, vote 47.38% a tla.
Boruak muanawm tak hnuaiah inthlanna hi neih a ni a, mipui ten an aiawh tur thlangin zing dar 7 atanga tlai dar 5 inkarah vote an thlak a ni.
By election neihna AMC Ward no 6 huam chhungah hian vote nei mipa 4601 leh hmeichhia 5300, an vaiin vote nei 9901 an awm a, State Election Commission-in an tarlan danin, vote tla hi za zela 47.38 a ni.
AMC ward no 6 huam chhungah hian veng 3 – Chanmari West, Edenthar Veng leh Hunthar Veng awmin, General Ward a ni a, candidate hi 3- ZPM candidate H Lalremtluanga, MNF leh Congress party in an thlawp independent candidate Lalrinfeli leh BJP candidate Chawnghmingthanga Zarkawt te an awm a ni.
Rorel lai ZPM hruaitute chuan by election-ah hian an cadidate chu mipuiin an thlan tlin ngei an beisei tih an sawi a, helai bial hi neutral tamna a nih avangin beiseina an nei sang tih an sawi a. An candidate chu thlan tlin a nih chuan sorkar chakna leh an corporator hmalakna in helai ward ah hian malsawmna tak tak a thlen an beisei tih a sawi.
Independent candidate Lalrinfeli thlawptu tangrual pawl hruaitute pawhin corporator boralta John Zosangliana hmachhawp te tihlawhtling turin a nupui lakah mipuiin beiseina an nei sang a, chu chu an tlin chhan tur a nih thu a sawi a, tangrual pawl candidate chu thlan tlin a nih chuan ward 6 hian AMC atangin duhsakna a tam thei ang ber an dawn an beisei thu a sawi bawk a ni.
WMA ward no 6 Corporator John Zosangliana bial thin a ni a, kumin March ni 21 khan a boral avangin, a hmun ruak luah tur thlanna hi buatsaih a ni ta a, vote tla te hi August ni 26 ah chhiar a ni ang.