- Ruata
British bike company hmingthang BSA Motorcycles chuan khawvel huapa an bike lar Gold Star chu India ramah an tlangzarh a, Jawa/Yezdi dealership atanga hralhchhuah tur a ni a, Royal Enfield 650cc bike ho nena inel ber tura beisei a ni.
BSA hi Mahindra Group hnuaia Classic Legends Private Limited (CLPL) in an lachhawng tawh a. Tunhnaiah Tube Investments of India Limited nen 50:50 Joint Venture hmangin BSA brand atan hian an thawkdun a. An lakchhawn danah hian India rama BSA neitu nihna, siamchhuah hna bakah component leh accessories siamchhuah te a huam a, Classic Legends hi a zuartu an ni tel bawk a ni.
BSA Gold Star hi rawng chi hrang hrang – Insignia Red leh Highland Green (Rs 2.99 lakh), Midnight Black leh Dawn Silver (Rs 3.12 lakh), leh Shadow Black (Rs 3.15 lakh) te a awm a. A khawl lam chu 652cc, single-cylinder, 4-valve, DOHC khawl, 5-speed gearbox nena thlunzawm a hmang a. He khawl hian 45bhp power chu 6,500 rpm-ah a pechhuak thei a, 55Nm torque chu 4,000rpm-ah a pechhuak thei a ni.
A speed sang bera chhut hi 160kmph a ni a. Suspension lamah chuan telescopic fork pangngai leh a hnungah twin shock absorber te kan hmu a, brake lamah chuan a hnung leh hmaah single disc brake a awm a, dual channel ABS kan hmu bawk a ni.
A kentel lamah chuan twin-pod, semi-digital instrument cluster leh USB charger te kan hmu a. A seat san zawng hi 782mm niin a rih zawng (kerb weight) hi kg 201 a ni.
- Thu nawi belh
Hman deuh khan Royal Enfield bike tih rik mawi nan leh tih rin nan Goldie/Goldstar Exhaust an vuah thin a. He bike thlalak kan dah exhaust hi han en vang vang la, BSA Gold Star exhaust (design ang) a ni tih i hre thei mai awm e!