Ramhlun South Aizawl mi kum 23-a upa Freddy Malsawmdawngzela chu August ni 19 khan khawlaiah thia chhar a ni a, he tual thihna kaihhnawihah hian mi pakhat man a ni tawh.
Freddy Malsawmdawngzela (23) s/o Thantlinga Ngente, Ramhlun South chu August ni 19,2024 chawhma dar 10 khan Vishal dawr,Bawngkawn bulah thia chhar a ni a, ruang hmu tute hian Bawngkawn Police an hriattir nghal a, a tirah unnatural death case ziah luh phawt a ni a, a hnua mi kut tuara thi nia hriat a nih leh tak avangin abetment of suicide case an ziak lut leh ta a ni.
Police hotute’n an sawi danin, Freddy-a thihna chungchangah a kawppui nia in sawi hmeichhia pakhat chuan mi kut tuara thih a nih an rinhlelh thu Police te hi a hriattir a, a thianpa chu thawmhnaw ha loa an sawisa lai Video te pawh a dawn thute Police hnenah hian a hrilh.
Kum 23-a upa Freddy-a thihna kaihhnawihah hian a thih hmaa a khawsakpui Zahmingthanga (28), Vawmbuk, Lawngtlai district chu manin Judicial Custody-ah dah a ni tawh a, he thihnaa rinhlelh dang hmeichhe pahnih Lalrinfeli (28) Bungkawn Vengthar leh K Laldampuii (23), Tuikual North te pawh Police te’n thu an zawt fiah mek a, hmeichhe pahnih erawh man an la ni lo thung.
Tualthahnaa inhnamhnawih nia puh Zahmingthanga’n Police hmaa a in puannaah chuan August ni 18 zan khan Bawngkawna Khiangte Home Stay chhawng thumnaah amah leh Freddy bakah hmeichhe pahnih te chu an awm tlang a, Freddy-a hi kut te pawh a lo thlak ngei tih pawh a sawi a ni.
Freddy Malsawmdawngzela hi postmortem a nih hnuah Thawhtanni zan khan lumen a nih hnuah a tuk Thawhlehni chawhnu khan an chenna in Ramhlun South ah vuiliam a ni.