- Ruata
TVS chuan an scooter hlun leh hralh tam Jupiter chu a chhuak thar 2024 model an tlangzarh thar a, Rs. 73,700 (ex-showroom) man atangin a intan dawn a ni.
TVS Jupiter hi scooter tha leh body pawh khauh tha tak nei a ni thin a. A khawl erawh 110cc huanga mi a nih avangin 125cc scooter te nena khaikhin chuan a chak lo hret thung a. Hetihrual hian a tui heh zawngah te, a scooter ngheh that thuah te chuan scooter fakawm tak a ni a. Phai ramah phei chuan a tha lehzual hle a, tlang ram chho ulhah hian tlemin a khawl tet hretna hi a lang ve zeuh thin a, hetihrual hian lei hlawh tak leh Mizoramah ngei pawh kan hman nasat scooter tha tak a ni.
2024 TVS Jupiter hi variant 4 – Drum, Drum Alloy, Drum SXC leh Disc SXC te a awm a. Design lamah thil thar kan hmu a. Platform thar nghahchhana duan a nih bakah kentel hrang hrang tha tak a nei a ni.
A khawl lamah chuan tarlan tawh angin 110cc huangchhungah a awm a, 113.3cc single cylinder khawl, 4 stroke fuel injected khawl kan hmu a, he khawl hian 7.9bhp (5.9kW) chu 6,500rpm-ah a pechhuak thei a, 9-9.8Nm torque chu 5,000rpm ah a pechhuak thei bawk a ni. He khawl hi BS6 emission standard mil a ni a, a top speed chu 82kmph a ni.
Low inertia crank shaft thar kan hmu a, a piston ring hi DLC coated a ni tawh bawk a. Piston zang tha tak a nei thar bawk a ni. Heng upgrade hrang hrang te hian mawlmang taka sawi chuan a performance-ah a pui dawn hle niin company lam chuan an sawi a. CVT unit thar a nei bawk a, transmission-ah hian dry clutch kan hmu bawk a ni. TVS hian an scooter, Jupiter hi an rawn tuai hnum thar a ni ber a, a hmaa chhuak scooter tha tak kha a rawn tha lehzual a ni ber a, lei manhla tak a nih hmel a ni.
Suspension lamah chuan a hmalamah telescopic hydraulic fork kan hmu ang a, a hnunglamah gas-filled suspension kan hmu dawn bawk a. Brake lamah chuan 220mm front disc leh 130mm rear drum brake kan hmu ang a. Tyre lamah chuan 90/90-12 54J front and rear tubeless ke te kan hmu dawn a, a kerb weight hi kg 105 a ni dawn a, a hma aia a zan daih dawn avangin a khawl hian a body pawh a zo tha viau tura beisei a ni.
Hei mai bakah hian a chhung bungraw dahna hi 33 litre lai a ni tawh dawn a, a hmalamah hian 2 litre thil dahna hmunawl a awm dawn bawk a. Kawng hrang hrangin TVS Jupiter hi a tha lehzual tawh em em a ni ti ila kan sawi sual awm lo e.