Nimina Hnam Rún chhung inkhawmah Lalringliana Adviser, MNF GHQ (Executive Corporator, AMC) chuan, 22nd August 2024 AMC Ward-VI Bye-Election tluang taka neih a ni chu lawmawm a tih thu a sawi.
Vanduaithlak taka Pu John Zosangliana Ralte boral avanga Bye-Election neih a ngai ta chu pawi a tih thu sawiin, MNF tan channa nasa tak a ni a ti. A hmunruak luahkhat tura a Nupui Pi Lalrinfeli (MNF & MPCC) Candidate intawm atana ruat a ni chu thil tihawm tak a nih thu sawiin, thawhhona tha tak hnuaiah inthlanna tluang takin neih a ni a ti. Pi Lalrinfeli Vote-tu zawng zawng chungah MNF chuan lawmthu a sawi a ni, a ti bawk.
Ringa chuan, Zoram mipuite chu, ‘Zofate’n leirem kan rah theihna turin tute nge thawkrim ber, tute nge hrehawm tuar nasa ber’, tih hre thar leh tura kan history enlet turin a ngen a. Hnam hmangaihna rilru hi a ral thianglo tih hre thar tur leh chu rilru chu kan put thar leh a tul thu sawiin; Thangthar rilru sang tak finnate hman thiam a tul thu uar takin a sawi. A hun mil zelin India sawrkar hnuaiah awm rih mah ila, Mizo hnam puanzar hnuaiah ngei Mizo hnam hla kan sak hun hi a thleng ngei ang, a ti.
Remna vawngnung a, rinawm taka kan ram tana thawktu, kan ram lo hruai tawhtute an fakawm takzet a, remna leh muanna avanga kan rama hmasawnna tam tak thleng tawh leh thleng mek te hi hmuh hmaih lovin, hmalam pan zel a, hmasawnna nasa zawk thlen tirtu ni turin MNF te i inbuatsaih sauh sauh ang u, a ti bawk.
Lalthanchhunga, Joint Secretary MNF chuan AMC Ward-VI Bye-Election neih chung chang report pein; khaw chhia leh chhiatna hrang hrang vanga vote tla a that loh thu sawiin, 47.38% vote a tlák thu leh Pathian leh Ward-VI Mipuite zarah beiseina sang tak kan neih thu a sawi.
Hnam Run chhung inkhawm hi C. Tawnvela Adviser, MNF GHQ chuan kaihruaiin, Lalbiakkima Zote Secretary, MNF GHQ chuan Nehemia Bung 2:7 thu te chhiarin, MNF party chu Mizo Hnam tan Pathianin awm lo ata awmah a din a nih thu leh MNF party chungah hian Pathian leh mipui thikthu a chhiat bik thu te sawiin, hunserh a hmang a ni.