August 23, Zirtawpni khan kar kal meka ni dang ang lo takin khua a tha a, ruah a sur tam lo. Ruah a sur tam loh ni hian LZ Juice MPL 11 Round 6-naah goal a lo sur ve thung a, inkhel pahnihah goal 13 ngawt a lut. MPL leh I Day champion Mizoram Police FC in si ruk faiin Sihphir Venghlun FC an sawp a. Aizawl FC pawhin FC Bethlehem lakah awlsam takin hnehna an chang ve bawk.
I Day champion thar Mizoram Police FC hian Siphir Venghlun FC lakah an khel tha tak zet a, chawlhlawk hmain goal thum ngawt an thun hman. MPFC tan hian Michael Lalbiaksanga chuan inkhel tan atanga minute lina lekah hmahruaina goal a thun. Hma taka goal an thun hian inrintawksa sang zawk a pe a, phur leh tha tho takin an inlan chhunzawm theih phah.
Inkhel tan atanga minute lina lekah goal an thun hnu hian MPFC an khel tha chhunzawm viau a, goal pawh an thun belh leh thuai. Lalhmunmawia chuan minute25-naah an goal hnihna thunin an hmahruaina a tizau a. Goal hniha hma an hruai hnuin MPFC tan hian Lallawmkima chuan minute 37-naah an goal thumna a thun belh zui leh nghal a, 3-0 a hmahruai chungin chawlhlawk an hmang.
Chawlhlawk hnu lamah MPFC an khel tha chhunzawm a, goal an thun belh leh thuai. Second half tan atanga minute lina lekah veteran striker Malsawmfela chuan an goal lina a thun. Siphir Venghlun laka an hmahruaina goal kha minute linaa an thun a ni a. Second half-a an goal hmasa ber pawh tan atanga minute linaah tho a ni. An goal thun dan hi a ropui dangdai riau. Malsawmfela goal thun hnu lawkah Lalruatpuia chuan minute 54-naah an goal ngana a thun zui leh chak a, an hmahruaina a tizau.
Darkar khat em pawh an khel tlin hmaa goal nga ngawt an chhuah vangin Siphir Venghlun FC in insiamthat an mamawh tak zet. An si phurh sut then ngei tumin tan khawh thin mah se goal an thun thei lova, hun tawp hmain goal an chhuah belh leh ta zawk. Minute 63-naah Isak Malsawmkima chuan MPFC goal rukna a thun zui leh a, SVFC dinhmun chhe zual zawkah a tluk luh tir. Isak-a goal thun hnuin goal dang a luh belh thei tawh lova, MPL 10 leh I Day tournament 2024 champion Mizoram Police FC chuan 6-0 ngawta Sihphir Venghlun FC an sawp a, awlsam takin point thum an hmu.
Si ruk fai ngawta Sihphir Venghlun FC an sawp tuma Mizoram Police FC tana khel tha tak Isak Isak Malsawmkima chu Kuriz man of the match ah thlan a ni.
Zirtawpni a inkhel hmasa zawkah goal ruk ngawt a luh hnuin inkhel hnuhnung zawk; Aizawl FC leh FC Bethlehem te inkhelah goal tam zawk a lut. Goal sarih ngawt luhna inkhelah Aizawl FC in 6-1 ngawtin hnehna an chang.
Season kal meka inelna hrang hranga chak harsat FC Bethlehem hian Aizawl FC lakah bul an tan tha viau a, goal thun hmasa zawkah an tang. FC Bethlehem tan hian inkhel tan atanga minute 16-naah Varun Raj Tamang chuan hmahruaina goal a thun. Goal thun hmasa zawkah tang mah se FC Bethlehem hian Aizawl FC an chhaihkawlh a ni ta ber a, I League team er let an tuar lo viau a, goal ruk ngawt an chhuah.
Goal chhuah hmasa zawka an tan hnuin Aizawl FC an harh zawk a, na takin an khingpuite an nawr zui nghal. I League-ah Aizawl FC an champion tuma defender langsar Lalruatthara chuan minute 33-naah goal thunin an si phurh a sut. FC Bethlehem laka khel tha tak Lalruatthara hi Kuriz man of the match-ah thlan a ni zui nghe nghe.
An si phurh an sut hnuin Aizawl FC an khel tha zui viau a, goal pawh an thun leh thuai. Minute 45-naah Laltlanhlua chuan hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Aizawl FC an khel tha chhunzawm a, a khat mawi tawkin goal an thun. Second half tan atanga minute thumna lekah Laltlanzova chuan AFC goal thumna a thun. Tlanzova goal hnu hnu lawk hian Lalhriatpuia chuan minute 54-naah an goal lina a thun a. 4-1 a hma an hruai hnu hian Peter Lalrinhlua leh Lalchhawnkima ten Aizawl FC tan goal an thun zui leh a, an khingpui FC Bethlehem te hi 6-1 ngawtin an lehthal a, awlsam takin point thum an hmu.
LZ Juice MPL 11-ah hian Chanmari FC leh Aizawl FC an khel tha tluang viau a, anni team hnih hi tlawm nei lovin an kaltluang mek. Chanmari FC leh Aizawl FC te hian table chung an luah dun mek a, an inkar tizau thei an la awm rih lo.