NIT Mizoram chuan National Space Day lawmna nimin, ni 23 August 2024 khan Vanapa Hall ah Zirlai dang te nen an hmang.
National Institute of Technology (NIT) Mizoram, Ministry of Education, Govt. of India hnuaia zirna in tha leh pawimawh bik (Institute of National Importance) chuan a tum pawimawh tak, zirna (education) quality tha pek leh thil thar ngaihtuah chhuah (innovation) tih hlawhtlin zel na atan ni 23 August 2024 khan National Space Day, Vanapa Hall, Aizawl-ah a hmang. He programme-in a tum ber chu thangthar te van chanchin (space) zirna lama phurna thar siamsak leh India ramin ‘space technology’ lama hmasawnna nasa tak a neih te tarlan a ni.
NIT Mizoram hi India ram zirna in hrang hrang zingah pawh hmasawn leh hriathlawh chho mek a ni a. National Institutional Ranking Framework (NIRF)-in ranking a tihchhuah hnuhnung berah pawh zirna in sang chuang zingah ‘rank’ 100-150 band-ah a awm pha tawh a ni.
National Space Day programme-ah hian Prof. S Sundar, Director, NIT Mizoram chuan National Space Day pawimawhzia sawiin “Vawiinah hian kan ram hlawhtlinna ropui tak tak te lawm tur mai ni loin nangni zirlai leh lo kalkhawm zawng zawng te rilrua van chanchin hriatna kawnga in tuina ti alh thar leh tura lo kalkhawm kan ni. Van chanchin zirna hi chona khirh tak tak leh thil ropui tak tak la haichhuah tur awmna a ni a. Nakin lawka kan ram hruaitu tur, engineer leh scientist tur te in nih angin hemi kawnga hma kan sawn zelna tur chu in kutah a awm a ni. NIT Mizoramin a tum ber pakhat chu hriatna leh thiamna hmanga thuam che u a, in tum tihhlawhtlin tir che u a ni. He kawng hi kan theihna zawng zawng nen kan vaiin i zawhho ang u,” a ti.
He hunah hian school leh college hrang hrang bakah NIT Mizoram atanga lo kalkhawm mi 600 chuang te tan programme chi hrang hrang buatsaih a ni a. Mithiam bik pahnih hnen atangin thusawi ngaihthlak a ni a. Dr. Nandakumar Ramanathan, Ex-Scientist, Space Applications Centre (SAC), ISRO, Ahmedabad in “Pushing the limits of Space Applications – An Evolving EO Example” tih hmangin thu a sawi a. Ms. Adane Khrasi, Scientist ‘D’ & Joint Director, Bureau of Indian Standards (BIS) hnen atangin “Indian Standardization, Standards Formulation, Challenges” tih thupui hmangin thusawi ngaihthlak a ni bawk.
Zirlaite tan thusawi hmanga intihsiakna buatsaih a ni a. Heng thupui chi hrang hrang, “Women in Space: Pioneers and Their Contributions,” “The Role of International Collaboration in Space Missions,” “How Space Technology Impacts Our Daily Lives,” “Private Space Companies: The New Frontier in Space Exploration,” leh “The Role of Artificial Intelligence in Space Missions” hmang tein zirlai te hnen atangin thusawi ngaihthlak a ni bawk.
Programme co-ordinator leh NIT Mizoram faculty, Dr. Sukanta Roy pawhin thu sawiin “Kan ramin hlawhtlinna ropui tak tak a hmuh te hi scientists, engineers leh thil thar hmuchhuaktute (innovators) chhiar sen loh te thawhrah a ni a. Van chanchin zirna kawngah hma min sawnpui mai ni lovin, khawvel hmuhah India theihna an phochhuak a ni. He hun hi India-in hlawhtlinna ropui tak tak a hmuhte kan hriatpuina leh kan lawmna a ni,” a ti.
He hunah hian ‘film’ tawi te te tarlan niin, chung zingah chuan “The Triumphant Voyage of CHANDRAYAAN,” “Vikram Sarabhai: A Legend,” leh “NavIC, The Indian Regional Navigation Satellite System” te an tel a ni. Heng film-ah te hian van chanchin zirna kawnga India hlawhtlinna leh chumi kawnga mi chhuanawm tak tak te chanchin tarlan a ni. Heng bakah hian National Space Day lawmna, Bharat Mandapam, New Delhi-a neih chu ‘live streaming’ hmanga enho a ni bawk.
Poster presentation hmanga inelna neih a ni a. A thupuiah “Advancements of Indian Space Technology & Its Applications” tih hman a ni a. ‘India Space Journey’ inelnaa telte thilsiam hmuhnawm tak tak tarchhuahna (exhibition) neih a ni bawk. Space leh Technology theme hmanga photobooth siam pawh dahchhuah a ni a, mi tam takin thla an lakpui a ni. Heng bakah hian, Indian Space subject hmanga quiz inelna neih a ni a, zirlai lo kalkhawm te tana inelna tha tak a ni. Inelna chi hrang hranga zirlai titha te hnenah lawmman tha tak tak pek an ni.
NIT Mizoram buatsaih National Space Day lawmna programme hi college leh school hrang hrang atanga lo tel te bakah NIT Mizoram zirlai leh faculty ten hlawkpui an ti hle a. Zirlai ten ‘space science’ lamah thil tam tak an zir piah lamah an thiam thil phochhuahna remchang tha tak a ni. Zirlaite rilruah vansang chanchin zirna lama phurna nasa tak a pek belhchhah ngei NIT Mizoram chuan a beisei a ni.