BJP Mizoram chuan inrinni khan Membership Drive Campaign Workshop neiin, he hun hmanpui tur hian Dr. Rajdeep Roy, Ex MP, State Incharge for Membership Drive Campaign-2024 leh Devesh Kumar, MLC Bihar, BJP Mizoram Prabhari te’n he hun hi hmanpuiin, Vanlalhmuaka, State President-in inkhawm kaihruaiin thusawina hun a nei bawk.
Vanlalhmuaka chuan, “Mizoram ah BJP Membership Drive Campaign kan nei dawn a, he hun ah hian BJP support apiangte leh Member lo ni tawh te pawh a thara inziahluh leh tur a ni a, BJP chuan kan Data kan hriat duh avangin hetiang hun Membership Drive Campaign hi neih ṭhin a ni,” a ti.
Hmuaka chuan sawi chhunzawmin, “Tunhnai mai ah Union Minister ṭhenkhatte Mizoram tana hmasawnna tur, Mizoram mamawh kan hriat te kan thlen leh a, kan indawr dan leh BJP nilo Sorkar Official-te indawr dan chu a dang hle a ni tih vawiin ah hian ka sawi duh a, Mizoram mipuiin thuneihna min pek loh avang leh State Sorkar nen kan thawh ho loh avangin hmalak thui erawh har tak a ni a, nimahsela mipui mamawh hmasawnna thlenna turin BJP Mizoram chuan hma kan la zel dawn thung a, tuna Mizoram harsatna te hi sutkian a nih theih nana hmanraw kawltu leh neitu chu BJP hi kan ni,” a ti bawk.
Dr. Rajdeep Roy, Ex MP State Incharge for Membership Drive chuan thusawiin, “BJP hi khawvela Party mala Member ngah ber kan ni a, India ramah crore 18 vel kan awm mek a ni. Kumina Membership Enrolment Drive kan neih turah hian a hma aia Member nei tam turin kan inbuatsaih a, Mizoram ah a tam thei ang ber BJP-a enroll turin hma kan la ang a, hma kan sawn leh zual nan hma kan lak a ngai a, Membership Drive pual hian India ram pum ah Workshop neih mek a ni a, a thawh khatna atan September ni 1 atanga neih tur a ni a, chumi zawh ah a thawhhnihna neih leh tur a ni dawn a ni,” a ti.
Dr Rajdeep Roy chuan, “Silchar-a awm ka nih vangin Mizo ṭhian ṭha leh hmelhriat tam tak ka nei a, Mizo Doctor ṭhianṭha tam tak ka nei bawk a ni. Chuvangin Medical Doctor ni a mipui rawng ka bawl naah Mizo abikin Kolasib thlang lam zawng te phei chuan min hre ve nual hlawm anga, Mizo mipui thianṭha tak tak te BJP Mizoram te’n a Membership Drive an neih hunah pawh PM Modi hnathawh mi retheite chawikanna hrang hrang Mizoramah ngei pawh kan chhawr mek te tun aia chak zawka hmalak a nih zel theih nana BJP Member-a inziak lut ve turin ka sawm che u a ni,” a ti bawk.
Inrinnia Membership Drive Campaign Workshop neih hi State Level-a neih a nih angin kawngchhiat vanga District ṭhenkhat lo kal thei lo an awm tih loh ah chuan Member kal tur a ruat te chu an kal ṭha hle niin an thuchhuahah chuan an tarlang a. Inkhawmah hian Devesh Kumar (MLC) BJP Mizoram Prabhari pawhin thusawina hun nei bawkin, Dr K Beichhua MLA State Core Group Member in Vote of thanks sawina hun a nei bawk.