EPL 2024-25 tan a ni a, champion tura rinkai Arsenal leh Manchester City ten table chung lam an luah a, an inum nghal chat. Arsenal hian season liam taah an champion na daltu langsar Aston Villa an hneh a. Champion lai Manchester City in awlsam takin kai thar Ipswich Town an hneh ve bawk.
- Villa Park-ah Laipui a puak
Arsenal hi season liam ta khan an khel tha tluang viau a, champion thei dinhmunah an ding. Season liam ta khan club dang lakah khel tha viau thin mah se Aston Villa lakah harsatna an tawk tlat thung. Aston Villa lakah hian vawi hnih ngawt an tlawm. Villa lakah point ruk ngawt an hloh hi an champion loh chhan lian ber a ni zui ta hial a ni. Gunners hi inrinni zan khan Villa Park-ah lenglutin season liam ta EPL-a an hneh loh zawn Aston Villa lakah fiahna hautak an hmachhawn. Season thara fiahna an hmachhawn hmasak an paltlang a, si hnih faiin hnehna an chang.
Villa Park-ah mualneitu Aston Villa leh an mikhual Arsenal te an inhnehtawk viau a, goal pawh a lut har hle. Inkhel tir lamah Arsenal defender Gabriel tihsual vangin Aston Villa in goal thun theihna hun tha zet mai an nei a, Ollie Watkins chuan awihawm loh khawpa makin a thelh tlat thung. Watkins hian goal thun nise inkhel result a danglam ngeiin a rinawm.
Derthawng taka an him hram hnuin Arsenal an insiamtha a, an khel tha zui ta viau. Inkhel hmuhnawm takah si nghak pahnih David Raya leh Emiliano Martinez ten save an nei tha thei hle a, hmuhnawm takin an inlan. Hun rei tak chhung goal lut a awm theih loh hnuin hun tawp dawn hnaiah Arsenal an che fuh a, goal hnih an thun. Arsenal tan hian bench atanga lut Liandro Trossard chuan minute 67-naah fuh zetin a pet goal a, hmahruaina goal a thun. Gabriel Martinelli thlaka lut Trossard hian mual chhung a luh atanga ball a tawh hmasak berah goal a thun nghal. A goal thun a lawm tha duh lo chuan lawm a hlawh phah hle.
Hnufual zawk ni mah se Aston Villa an insiamtha thei lova, goal an chhuah belh leh thuai. Trossard goal thun atanga minute 10 hnu lekah midfielder Thomas Partey chuan Bukayo Saka siamsak tha tak atangin an goal hnihna a thun a, an hmahruaina a tizau. Partey goal thun hnu hian goal dang a luh belh tawh lova, Arsenal chuan Villa Park ah point thum hlu tak an hlawhchhuak.
- Haaland bawk
Inrinni zana inkhel dangah champion lai Manchester City chuan Etihad Stadium-ah kai thar Ipswich Town an mikhual a, goal chhuah hmasa zawk ni mah se 4-1 in hnehna an chang let. City tana goal thuntu hi Erling Haaland bawk a ni a, Haaland hian EPL-ah a vawi sarih nan hattrick a siam.
Etihad Stadium a lenglut Ipswich Town hian rin phak baka thain bul an tan a, goal thun hmasa zawkah an tang teh mial. Fuh taka an nawr let hnuin Sammie Szmodics chuan inkhel tan atanga minute sarihna lekah Ipswich Town hmahruaina goal a thun. Goal thun hmasa zawka an tan vangin phur viau mah se an khingpui City an chhaihkawlh a ni lek fang a, City tan khawh chu an tan dan mi rual an ni.
City hian an si phurh sut tumin tan an khawh nghal chiam a, goal an thun thuai. Nipui bazar inhawng meka an player lak luh hmasak ber Savinho chuan penalty a hlawhchhuak. He penalty hi Erling Haaland chuan awlsam takin a pet goal a, minute 12-naah an si phurh a sut. Goal khat ve ve an thun hnuin City in an nawr na zui viau a, an khingpuite an nawr buai. Penalty hlawhchhuaktu Savinho chuan an khingpui si nghak Arijanet Muric ball a chhuhsak a, goal a thawkchhuak zui leh. He ball per hei Kevin de Bruyne chuan awlsam takin goal ruakah a pet goal a, minute 14-naah hma an hruai letna goal a thun.
Inhnaihchilh taka goal an chhuah zawn vangin Ipswich Town an talbuai zui viau a, goal an chhuah leh thuai. An si phurh sutna goal thuntu Haaland chuan minute 16-na lekah De Bruyne siamsak tha zet chu goal-ah a chantir zui leh a, an hmahruaina a tizau. City in minute ruk chhung leka goal thum an thun hman vangin an mikhualte hi an sawi zui nek tura ngaih a ni a, beisei angin goal a lut tam ta lo thung. Hun rei tak goal a luh belh theih loh hnuin hun tawp dawn hnaih minute 88-naah goal hnih thun tawh Haaland chuan a goal lina a thun a, hattrick a siam. Haaland hian EPL-ah hattrick vawi sarih ngawt a siam tawh a, a ropuina ram a zauh zel. Season hnih chhung top-scorer ni zawn tawh Haaland hian season tharah khelh hnih atangin goal li a thun leh der tawh a, a lungthu kim nan EPL top-scorer a nih a rinawm leh ta hle.
A muala Ipswich Town an hneh tum hian City captain hlui, Barcelona atanga let leh Ilkay Gundogan chuan hun tawp dawn hnaih lamah mual chhung a lut a, a ropuina hmunah lawm a hlawh nawn leh viau a ni.