Inrinni khan K. Sapdanga, Home Minister chuan a bial chhung Hunthar veng hmun hniha lei chetna National Highway Sairang Road leh Hunthar Middle School bul lei chetna hmun a tlawh a, he hunah hian Aizawl SP, SP Traffic leh PWD SE leh Officer dang ten an ṭawiawm.
K. Sapdanga chuan, National Highway Sairang Road Hunthar lei tlahniam tia hriat lar chu a hmunah a tlawh a, hna thawh mek dan te a en a, hna chak zawka thawh nise a duh thu a sawi, PWD lamin ruahmanna an siam te ṭha tawk hlein a hria a, lawmawm a tih thu a sawi bawk. He lai kawng tlahniam vanga Traffic jam nasa ṭhin pawh Traffic Police lamin lo vil uluk deuh turin a chah nghal bawk a ni.
Hunthar LC leh NGO ten Hunthar Middle School bul che vanga thu chhuah an siam chungchang pawh Minister chuan chhangin, ṭhahnemngaihna vanga heng thuchhuah an siam hi an demawm loh thu a sawi a, chutihrual chuan sorkar hmalakna kal mek a nih avang leh fur ruah tui tlak lai a nih avanga hna duh anga thawh theih a nih loh avangin sorkar lo ngaichang thiam hram turin a ngen. He lai hmun hi MLA a tlin tirh aṭanga a vei thu leh, Unit hruaitute leh LC te nen pawh an lo en ho tawh thu te, sum tam tham deuh a ngaih dawn avanga hmalak zung zung harsa a nih thu a sawi a. Kumin chhung ngeia he lai hmunah hian hmalak ngei tuma ruahmanna an siam thu leh DPR pawh peih fel a ni tawh thu a sawi bawk.
Sapa chuan, “Pathian leh mipui zara sorkarna kan chan tirh khan he lai hmun hi kan Unit hruaituten min tlawh pui nghal a, Middle school kawt khi te pawh a hmunah kan en a, DM & R lamin pawisa an nei lo nachungin School tuala tui lut ṭhin tih reh a nih theihna turin Road cutting te kan han tih tir nawk nawk a, a khi lai te pawh lei hnawhin Cement-a zut phui nghal a ni bawk. Kan hriat angin kuminah ruah tui a tlak tam em avang leh a thlang lam aṭanga lei che a nih avangin vawiin hi kan thleng ta a, a pawi hle a ni. Sapnela huan tia kan hriat chawpchilh taka sum awm leh awm lo dap chawpa lei kan siam pawh dinhmun der thawng takah a ding a, tunah hian lei hi a chhiat mai lohna turin khaw chhe karah hna thawh mek a ni bawk a, he lai hmunah hian kan theih tawp kan chhuah a, kan la chhuah zel dawn a ni” a ti bawk.