August 26, Thawhtanni khan LZ Juice MPL 11 Round 7 khelh tan a ni a, hmahruaitu Chanmari FC chuan awlsam takin Ramhlun Athletic FC an hneh a, an hmahruaina an tizau. Thawhtanni a inkhel dangah season kal meka chak la nei lo FC Bethlehem chuan champion lai Mizoram Police FC an hneh a, a vawi khat nan point thum an hmu.
- Chanmari chelh zo an awm lo
LZ Juice MPL 11-ah Chanmari FC an khel tha tluang hle a, round sarihna an khelh thlengin tlawm an la nei lo. Tlawm nei lova kal tluang mek CFC hian Thawhtanni khan RG Stadium, Mualpui-ah palinaa awm mek Ramhlun Athletic FC an hmachhawn a, 6-1 ngawta hnehna changin point ngain hma an hruai fal. Vawiin a inkhel tur Aizawl FC an chak a nih chuan Chanmari leh Aizawl FC te inthlauhna hi point hnih a ni thar leh an.
Ramhlun Athletic FC hian hmahruaitu Chanmari FC lakah bul an tan tha a, inkhel tan atanga minute 11-na lekah Felix Lalruatsanga chuan hmahruaina goal a thun. Goal thun hmasa zawk an nih vangin phur viau mah se Felix-a goal hian an khingpuite a chhaihkawlh ta tlat thung a, Chanmari FC in goal ruk ngawtin an chhang let.
Hma takah goal an chhuah vangin Chanmari FC an buai lova, an insiamtha thuai. Minute 21-naah Lalrinchhana Tochhawng chuan goal thunin an si phurh a sut. Goal khat ve ve an thun hnuin an inhnehtawk zui viau a, goal pawh a luh belh lawk thei lo. Inkhel hmuhnawm takah hian Chanmari FC tan KC Malsawmsanga chuan chawlhlawk dawn hnaih minute 42-naah hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Chanmari FC an khel tha leh zual a, goal li ngawt an thun belh. CFC tan hian Lalkhawpuimawia chuan minute 64-naah penalty atangin an goal thumna a thun a. Khawpuimawia goal thun atanga minute thum hnu lekah KC Malsawmsanga chuan an goal lina a thun belh zui leh zat. 4-1 ngawta hma an hruai vangin Chanmari FC an chak ngei dawn tih a chiang tan viau tawh. Ramhlun Athletic hian an si phurh sut mamawh viau mah se goal chhuah belh zawkah an tang. Chanmari FC tan hian Moses Lalrinzuala leh Lalrokima ten goal an thun belh zui leh a, Ramhlun Athletic FC lakah hian 6-1 ngawtin an chak zui ta a ni. He inkhel hmuhnawm takah hian Chanmari FC tana khel tha tak Malsawmzuala chu Kuriz Man of the Match-ah thlan a ni.
MPL 11-ah Chanmari FC an khel tha zui zel a, khelh sarih chhung tlawm nei lova kaltluangin, point 19 an hmu a, Aizawl FC nen an inkar an tizau. Ramhlun Athletic FC hian khelh sarih atanga point 9 hmuin palinaah an awm ve thung.
- FC Bethlem an chak ta e
Thawhtanni a MPL inkhel hnuhnung zawkah MPL club thar FC Bethlem chuan inlehthalna lian an thlentir a, champion lai Mizoram Police FC chu 5-2 ngawtin an hneh.
MPL 11-ah chak la nei lo, khelh ruk atanga point khat chiah la hmu FC Bethlehem hian MPL leh I Day tournament-a champion Mizoram Police FC lakah an khel tha viau a, chawlhlawk hmain goal thum ngawt an thun hman. Darkar khat em pawh an khelh tlin hmain goal nga ngawt an thun. Hun tawp dawn hnaihah goal hnih chhuah zawn mah se hnehna an chang ta tho a, champion lai hnehin inlehthalna lian an thlentir.
FC Bethlehem tan hian minute 12-naah Lalfamkima chuan MPFC laka an hmahruaina goal a thun. Famkima goal hian a fuih phur viau a, inrintawkna sang zawk nen MPFC lakah an inlan chhunzawm. Hmahruaina goal an thun hnu hian Lalnunzira Sailo chuan chawlhlawk hmain goal hnih a thun belh a, FC Bethlehem hian 3-0 ngawta hmahruai chungin chawlhlawk an hmang.
Table mawngphaha awm FC Bethlehem lakah si thum ngawt phur tawh mah se MPFC an insiamtha mai thei lova, second half tir lamah an talbuai chhunzawm. FC Bethlehem tan hian Kuriz man of the match a thlan zui tak Lalfamkima chuan an goal lina thunin an hmahruaina a ti zau. Minute 57-na lekah Lalrammuanpuia chuan FC Bethlehem goal ngana a thun zui leh bawk a, champion lai Mizoram Police FC lakah 5-0 ngawtin hma an hruai.
FC Bethlehem lakah 5-0 ngawta an hnufual hnuin MPFC hian goal thun ngei tumin tan an khawh a, hun tawp dawn hnaiah goal an thun ta nge nge. Lalbiakthanga Hmar chuan minute 81-naah goal thunin an si phurh a sut then. Goal thun belh tumin tan an khawh zui chiam a, hun pek belh minute 90+5-ah F Lalrinpuia chuan penalty atanga goal thunin an si phurh a sut then a, an inkar tizim hret mah se tlawm an pumpelh zo ta chuang lo a ni.
MPL 11-ah hian Chanmari FC leh Aizawl FC te tlawm nei lovin an kal tluang mek a. Champion lai Mizoram Police FC hian khelh sarih atangin hnehna vawi thum an chang a, tlawm zawkah vawi li an tang tawh thung.