Pathianni zan khan English Premier League khelh chhunzawm a ni a, team lian Chelsea leh Liverpool ten hnehna changin point thum an hmu. Chelsea hian an khingpui Wolves hi 6-2 ngawtin an hneh a, Liverpool hian an mikhual Brentford an hneh ve bawk.
Molineux Stadium a lenglut Chelsea hian Wolves lakah bul an tan tha viau a, inkhel tan atanga minute hnihna lekah Nicolas Jackson chuan hmahruaina goal a thun nghal. Hma takah goal chhuah mah se Wolves an insiamtha thuai a, an mikhualte an chhang let thuai. Wolves tan hian Matheus Cunha chuan minute 27-naah goal thunin an si phurh a sut. Goal khat ve ve an thun hnuin inkhel a hmuhnawm chhunzawm a, chawlhlawk dawn hnaihah goal an thun belh leh ve ve. Chelsea tan Cole Palmer chuan minute 45-naah hma a hruai letna goal a thun a. Chawlhlawk dawn hnaih minute 45+6-ah ‘Jørgen Strand Larsen chuan Wolves tan goal thunin an si phurh a sut zui leh a, 2-2 a inhnehtawk chungin chawlhlawk an hmang.
Chawlhlawk hnu lamah Chelsea an khel tha lehzual a, goal li ngawt an thun belh. Second half tan atanga minute lina lekah Noni Madueke chuan Chelsea hma hruai nawn lehna goal a thun. Noni Madueke hian minute 58 leh 63-ah te goal a thun belh zui leh a, Wolves lakah hattrick a siam. Madueke-a’n hattrick a siam hnu hian Atletico Madrid atanga an lak luh thar João Félix chuan minute 80-naah Chelsea goal rukna a thun belh zui leh a, Wolves lakah awlsam taka hnehna changin point thum an hmu zui ta a ni.
Season liam taa beisei phak lo Chelsea in season tharah bul an tan tha lova, an match hmasa berah an tlawm nghal. An mahni ang thova tlawm chunga bul tan Wolves lakah phu takin hnehna an chang a, manager thar Enzo Maresca hnuaia a vawi khat nan point thum an hmu. Chelsea in point thum an hmu lai hian Wolves erawh chu season tharah an tlawm zawn thung.
Pathianni zana inkhel ngaihven hlawh dangah Liverpool chuan Anfield-ah Brentford an mikhual a, si hnih faia hnehna changin point thum an hmu. Manager thar Arne Slott hnuaiah Liverpool khel a hmuhnawm viau a, hnehna an chang zawn bawk nen Reds tantute an phur thar hle.
Liverpool hian an mikhual Brentford lakah an khel tha viau a, inkhel tan atanga minute 13-na lekah Luis Díaz chuan hmahruaina goal a thun. Hma takah goal thun mah se goal dang erawh an thun belh har viau thung. Hun tawp dawn hnaih minute 70-naah Mohamed Salah chuan Luis Díaz siamsak atangin an goal hnihna a thun a, an hmahruaina a tizau. Salah goal thun hnu hian goal dang a luh belh tawh lova, Liverpool in an mualah si hnih faia hnehna changin point thum an hmu. Liverpool hian khelh hnih atanga point ruk hmuin palina an luah mek a, Brentford hian khelh hnih atanga point thum hmuin 13-na an luah ve mek thung.