- Zoliansanga Tlau
‘Daisy’ tih hla avanga lar Mizo mipa zaithiam Lallungmuana hi November ni 13, 1973 khan Tlungvel khuaah a piang a. A pa hming chu Thanmawia (L) niin a nu hming chu Laltlanthangi a ni. Unau 5 zinga a upa ber dawttu a ni a. Kum 15 a nih kum atangin hla a phuah tan tawh. Zirna lamah BA thleng a zir bawk.
Kum 1998-a Daisy Album-a hla awm zawng zawng deuh thaw kha kum 20 a nih kum 1993-a a phuah vek a ni a. Hla hi 40 vel bawr a phuah tawh a. Kum 1993 lai vel kha chuan zaithiam te’n zoram mipuite hriata an inpho chhuahna platform hmasa ber chu Radio a ni tlangpui a; amah pawh hi khatih laia A.I.R Aizawl announcer Pi Laltlanthangi khan audition nei ve tura sawmin, a tling ve ta hlauh va, kum 1994 kum tawp lam atangin AIR-ah hla a thun tan ve ta a ni.
Khatih laia Mizo zaithiamte zai dan inang pet pet ang lo deuh a, zai dan style nei hrang a nih avangin mi tam takin duh viau mah se, sawiseltu an awm ve nawk tho va. ‘A zai dan hi a Mizo lo, kan hnam zia pawlh dalna a ni’ tiin AIR zawhna leh chhannaah pawh an lo khel ve laih laih thin a ni.
Kum 1995 khan Synod Recording Studio-in ‘New Singers Vol – 2’ an tihchhuah leh turah, artist an thlan zingah tel vein Gospel hla pakhat ‘Nun kawng hruaitu’ tih hla a thun ve a. Tichuan, kum 1997 khan Pu Pachhuana (of Tornado) khan recording studio ‘RB Records’ a din a. He studio-ah hian ‘Daisy’ Album kha siamin kum 1998 khan an release thei ta a ni. He album hi copy sing chuan fe a hralh nghe nghe.
Daisy Album-ah khan hla 12 a awm a :
- A rem si lo
- Chhingpuii
- Daisy
- Fam zun ngaih
- Hrilh tihai
- Kar a hla
- Lo kir leh rawh
- Empy
- Rualhlui sakhmel
- Suihlunglen
- Tlawmngaihna
- Vanglai nun
Khi’ng hla ho zingah khian ‘Empy’, ‘ A rem si lo’ leh ‘Rualhlui sakhmel’ tih loh chu amah Lallungmuana phuah vek a ni a. ‘Empy’ tih hla hi tun hmaa Gospel Singer thin Lalawmpuia, Mission veng, Aizawl awm phuah a ni a. ‘A rem si lo’ tih hla hi Lalneihkimi phuah a ni thung. ‘Rualhlui sakhmel’ hi chu hla phuah thiam famta Bda phuah a ni bawk. A hla phuah ho zawng zawng khi a thu leh a thluk zawng zawng ama siam vek a ni. A hmaa kan sawi tawh angin a hla phuah ho zawng zawng khi kum 20 a nih kum, kum 1993-a a phuah vek a ni. Naupang tea hla tha tak tak a phuah chhuak thei leh a thluk a siam mai thei kha a ropui ngawt mai.
Lallungmuana hi Mizo mipa zai thiam ka hriatah chuan zai thiam ka tihte zinga mi a ni a. ‘Chhingpuii’ tih hla a sak ngaihthlak phei hi chuan sang a tlin si a, Steelheart Band-a vocalist Mijenko Matijevic-a rilruah a lo lang chawpchilh nghal thin. A album ‘Daisy’ cassette kha kan Tape-in kan ngaithla nasa thin hle a. A hla ho kha sakpui theih loh nei lo khawpin kan bel a. A awin sang a tlin si, a hla ho lah a mawi bawk si, a zai dan mawlh kha thianza hovin kan sawi ve nasa thin hle. Zai dan inang pet pet thin, zai dan thar min hluitu a ni bawk avang khan Zoram khan a hre nghal vat ni pawhin a hriat a. Tun hnu hian a hlate ka la ngaithla fo va, lung a leng thin hle. Tunlaiah chuan inbiakpawhna a lo thain a lo awlsam ta bawk a, Lallungmuana nen pawh hian Facebook leh Whatsapp hmangin kan in be fo va, ka hriat duh ka zawt fo bawk. Tunah hian Aizawl Durtlang Leitanah a nupui fanau te nen an khawsa mek a ni.
A hla sak hoah Daisy, Fam zun ngaih, Chhingpuii, Kar a hla, Rual hlui sakhmel, Suihlunglen, Tlawmngaihna leh Vanglai nun te hi mawi ka tizual a. He’ng zingah hian ka rilru khawihtu zual deuh tarlan pahin kan sawi zau ang.
Mitin hian vanglai hun kan nei theuh mai a. Chu kan vanglai hunah chuan kan cham reng thei lo va, hun leh ni, thla leh kumte a liam ve zel si avangin kan vanglai hunte chu a liam leh mai thin. Kan hun liam tawhte kan han chhui kir chang chuan kan thiante nena hlim taka kan inkawm laite, hlim taka hun kan hman ho laite mitthlaah a lo lang uar uar a. Kan thiante thenkhat lah thihna avangin mual an liam a, a then nupui pasal neiin hmun dangah an lo awm a, chutiangin eizawnate avangin hmun dang dangah awm darh an lo awm bawk nen, hmana kan hlim nite, lui kan kalna, sava kan vehna hmun te, thang kan kamna hmunte, thintuah tur kan lakna hmunte chu ngai reng mah se, mihring kan danglam thin avangin a hma anga hlim a har tawh thin. Lallungmuana pawh hian ‘Vanglai Nun’ tih hlaah hetiang hian a sawi a,
Vanglai Nun
“Mahriattea run nghakin,
Ka dawn kir kan hlimlai ni,
Aw, ka ngai e vanglai ni,
Hun leh ni lo her zelin,
Kumpuisul tam vei mah se,
Ka nghilh lo’ng kan vanglai nun,
Tuanna tlang dang thin mah se.
Ngaiin ka au nunhlui liam hnu,
Hlim zai vawra lenlai ni,
Perhkhuang rem a laichhuat mawiin,
Chhuihthangval lanu leng zawngte,
Aw, Khaw’nge in tuan tak le?
Suihlung rualpui zaleng zawng kha,
Thenkhat rihsang an kai a,
Kir rel lote’n an her liam e.
Rualduh leng hlim zai vawr a,
Suihlung ruala pheikhai thenin,
Eng dang ngai lo va lenlai ni,
Nghilh zai reng ka rel thei lo,
Zotui thianga ruang bualin,
Kan chen tu dang ngai lo te’n,
Thingtin par tlan sirva leng te’n,
Zai vawrin min lo awi.
Ka rawn fang leh kan vangkhawpui,
Tunah rial ang lo dai e,
Vanglai chen zaleng zawng kha,
Mualzapui an liam zo ta,
Theih chang se auh kir ka nuam,
Zamual lian hnu ruahduhte,
Tin, sakhmel intawng lehin,
Rualduh lawm a kim ngei ang” tiin.
William Shakespeare-a lemchan ‘Hamlet’-ah khan Lalnuin, Hamlet-a hnenah “I pa thi tawh kha kawng lak vaivut zinga chhar chhuah leh theih i beisei em ni? Thil nung zawng zawng hi thi tura piang vek kan ni a, hun ral thei chhung atanga chatuan hun la pakai vek tur kan nih hi i theihnghilh ta em ni” a tih ang khan “Thil nung zawng zawng hi thi tura piang vek kan ni” a. Mahse, kan han inthihsan meuh hi chuan thil thleng tur mah ni se, hriat thiam a har a, lung a chhia a, muttui a thla ?hin zawng a nih hi. Lallungmuana pawhin mitthi ngaia lunglengin hetiang hian a chham chhuak a :
Fam Zun Ngaih
‘Ka tawngmang em ni ngai le?
A riang ka van a duang chuang fam zun ngaih,
Aw, a na, ka tuara’n vanpui lo chim e,
Nghilh hian ka mawi thei si lo,
Kir zai an rel tawh si lo,
Lunglam vai tihian ka sam a,
Duh thuleng
Fan ka nuam an zalna dai,
Tawng ila an rauthla leng,
Thliah sakin then lohna par,
Pawm ila duhte’n tangah,
Luaithli nul ka tah lai,
Thlafam zun leng ngaih ka bang ang.
Hnutiang hawi an rel lo,
A riang ka chan tur an dawn lo,
Pialral chenin,
Fam hnu a leng zawng nau ang nui hiauvin,
Damlai khawvel an ngai lo,
Faisa ringin zaleng zawng,
Lungloh tui an dawn a,
Hawilo par tawnin.
Aw, khaw’nge in tuan tak le?
In sakhmel tawn tur awm lo,
Mahriak te’n lunglam ka vai,
In sulhnu chhuiin,
Aw, ka rawn zawng che u.” tiin. He hla ngaihthlak hi chuan C. Durthanga hla phuah ‘I rau thla tal rawn tir rawh’ tih hla te pawh rilruah a rawn lang chawpchilh nghal ?hin.
A tir lama kan sawi tawh angin Lallungmuana hian ‘Daisy’ album-a a hla phuah zawng zawng kha kum 1993-a kum 20 a nih kuma a phuah vek a nih thu kan ti tawh a. Hetiang kum lek a, vanglai hun ngaia lungleng thei, mitthi ngaia lungleng tawh leh Pi leh pute nun mawi ‘Tlawmngaihna’ hlut nachang a hria kha, tunlai ?awng takin a lo ‘advance’ hle mai. Hetiang hian a phuah a:
Pipute Tlawmngaihna
Hmasang kan pipute nun dan,
Thlir kir a lungdumtu ber,
Chanhai, mangangte hnem thintu,
Riangvai, lusun thinlai hnemtu,
Mihrang, sahrang, doral hrang vel kar a,
Zam rel lo val rual te’n an lo vawn nun,
Zonun mawitu, zofate hnemtu tlawmngaihna
Chuai lo te’n vul zel la,
Zoram timawi turin,
Tlawmngaihna vul zel la,
Zoram I mawi ngei ang,
Thang leh thar te’n,
Zaiin kan awi nang che.
Hmanah kan pipute vangkhaw daiah,
Lawm lungrual te’n chhuahtlang mawiin,
Hlimte’n losul lamtluang an mawi,
Lenrual lunglawm a kim ngei a,
Chak lo, tha thum tanpui ngai tanpuiin,
Chhuihthangval rual te’n rual hnung dawlin,
Tlawmngaihna par an vul tir zel zonun mawia’n.
Hmanah kan pipute vangkhaw mawia’n
Tlawmngaihna par mawi ianga vul chiai e,
Hlimte’n a par zu an chen vel e,
Lenrual lunglawm a kim ve nan,
Keini’n kan pipute dung chu thulin,
Kan vawng reng dawn zo thang leh thang te’n
Uai a chul mai atan zawng i pamhmai lua e – Tlawmngaihna.