BJP Mizoram chuan an office Upper Republic ah Karthar Inhlanna leh Political Session nimin khan neiin, Lalbiaknunga Ex-Freedom Fighter Cell Chairman-in inkhawm a kaihruai a, Laldawngliana State Executive Member-in hunserh hmangin Vanlalhmuaka,State President-in thusawina hun a nei bawk.
Vanlalhmuaka, State President chuan, “Lengpui Airport siamna tur sum hi pek ni tawhin hmasawnna erawh a kal muang hle mai a, Central hian kan State hruaitute ai hian min ngai pawimawh zawk hle niin a lang. Tin, Four Lane kawngpui pawh hi Central hmalakna a ni a, sum pawh awm sa a ni. Nimahsela vawiin thlenga kawng ṭha kan neih theih loh chhan chu State Sorkar hian kawng siamna tur atan a tih tur a tihfel loh vang a ni thung a ni. Sorkar hian Ram hmasawnna aia ngaih pawimawh dang an nei ṭhin a, Compensation buaiin kan buai luih luih a, vawiin thlenga Vairengte leh Aizawl inkar kawng chhiat vangin kan buai phah ta a ni. Chuvangin Mipui hian thil tak tak kan ngaihtuah a ngai a ni. Tin, Aizawl khawpui tawt lutuk leh Traffic Jam nasa lutuk tih ziaawmna tur Aizawl By-Pass Road siamna tur pawh Central chuan Rs. 500/- Cr min pe a, nimahsela vawiin thleng hian hnathawh theih a la nilo hi a buaithlak hle bawk a, Mizoram hian State dang hmasawnna kan hmuin kan thlir a, kan kawtkaia awm tur erawh chuan a ngaihna kan hre lovin, mimal anga hlawkna kan tel ve theih dawn loh chuan kan tikhawtlai duh ṭhin ni pawhin a lang a ni,” a ti.
Vanlalhmuaka chuan sawi chhunzawmin, “PM Schemes hrang hrangte Mipui te’n kan hman ṭangkai theihna turin National hruaitute nen Meeting kan neihna ah kan sawi a, a bikin MUDRA LOAN te pawh Central-in Bank hrang hrangah Loan pe turin ruahmanna a siam a, hei pawh Eizawnna bul ṭan tur te tana ṭangkai taka hman theih a nih avangin a pawimawh hle a ni. State Sorkar ngei pawhin an Policy nen kaihkawp tumin Hand Holding Policy ah kaihluh an tum niin a langa a lawm mawm rualin PM Schemes chu PM Schemes a nih anga ṭha taka lo thawhpui a, rem leh rem lova mahni Party hamṭhatna atana hman tum mai lo tur leh a chhawr tur dik tak Eizawnna bul ṭan tur lte tana awlsamna kawng lo zawn pui se State Sorkar tan achievement ropui tak a ni ngei ang,” a ti bawk.
Inkhawmah hian Membership Enrolment Drive Co-ordinator Lalthangmawii, State General Secretary-in Membership Enrolment Drive District hrang hranga Workshop neih dan tur puanchhuahna hun a nei bawk.