ZPM party chhung inkhawm nimina neihah, Dr.Keneth Chawngliana Vice Chairman, Mizoram State Planning Board chuan, “Party pahnih an thawh dun reng rengin pakhat zawk an ral fo thin. Eptu party lian tang dunin party naupang ber an beihrawn ta hi thil thar a ni lova, tun hma politics-a thil lo thleng fo tawh a ni. Kalphung hlui leh kalphung thar inthlak mek hi mipuite pawhin kan hrethiam tan viauin ka hria a, kan ram thatna tura sawrkar hmalak meknate mipuiten theihtawpa thlawpin I tawiawm ang u,” a ti.
Dr.Keneth Chawngliana chuan, “Kan ram kalphung leh hruaitu hmasate rorel danah mipui phunnawina a tam tak em avangin ZPM Party a lo ding ta a. Chona nasa tak hmachhawnin Kalphung thar mipui Sorkar tiin mahni inhalralin kan rawn pen chhuak ta a ni. Mipuite pawhin kalphung thar hmuh hi kan lo chak ta hle mai a, Sorkarna hial min pe ta a. Kalphung thara hma kan lak mek lai hian hun engemaw chen chu mipuite pawh chhel taka kan awm a ngai hle. Eptu party lamin kalphung hlui Aigupta sabel mipui hnenah an lo tawktarh bang lova, nimahsela, dam lo damna turin damdawi kha kan in barh a ngai thin. Chu damdawi chuan hna a thawh hunah chuan damlovin damna a lo chang dawn a ni. Kalphung hlui leh kalphung thar inthlak mek hi mipuite pawhin kan hrethiam tan viauin ka hria a, zirtirtu transfer leh sorkar hmalakna dangahte pawh mipuiin min thlawp ta hle a, kan ram tana tha tur a ni tih hriain zirtirtu transfer-te pawhin lungawi takin kan ram tan tiin an hna an zawm mek a ni. Party pahnih an thawh dun reng rengin pakhat zawk an ral fo thin a, eptu party lian tang dunin party naupang te an beihrawn ta hi thil thar a ni lova, tun hma politics a thil lo thleng fo tawh a ni,”a ti.
Planning Board Vice Chairman chuan, “Hun inher chho zelah State puitlinga hlan kai niin thuneihna sang tak nen special category state- ah min dah a. Duhsakna tinrengin Central Sorkarin min vur a, North East state tan NEC, DoNER leh NABARD hmangin hmasawnna tur pawisa thahnem tak hman theih min ruahmansak a, tun hnaiah SASCI hmangin hmasawnna tur min ruahmansak leh bawk a ni. Chutiang khawpa central sorkarin state kan nih hnu pawha duhsakna leh malsawmna tam tak kum 37 zet a vur hnu pawhin kan ram hian hmasawnna tluantling a nei thei chuang lo a ni. State kan nih kum atanga chhut chuan mite entawn leh kan chhehvel state te pawh hmasawnna kawng kawhhmuhtu tur kan ni a. Mahse nau sawngnawi ang mai hian kan than hi a thu tlat a, heng thil zawng zawngah hian tute nge mawhphurtu tih chu mipuite hian an hria a ni. He khawvel hi intlansiakna ram a ni a, a ruh no no chhuakah tiin politics huangah pawh ke kan pen a tul thin a. Mahni ram chhungah ni mai lovin State dangte leh ram dangte kan intlansiakpui tur a ni. Tourism leh Education lamah kan thenawm state-ten hma an sawn hle a, hriselna kawngah pawh hma an sawn hle. Law & Order chungchangah pawh tuna kan home minister-in theih tawpa a bei chung pawh hian a harsa hle a, State dang nena kan intlansiaknaah hian a hnufual pawl kan ni tawhin a lang. Samdala policy hmangin kan lo kal rei tawh lutuk a, thawk mang lova hausak tumna rilru hi kan politician hmasate min pek a ni a, zawmthawtna leh nawmchenna hian kan Politiciante kha a buan tlu hle niin a lang. An ni chauh ni lovin, kohhran NGO leh ramhruaitute pawhin buaipui hmasak loh tur kha kan buaipui emaw ka ti thin. Chuvangin tan lakna tur kan ngah hle a, sawrkar leh mipui kan tanrual a ngai a ni,” a ti bawk.
ZPM Vice President W.Chhuanawma chuan AMC by election neih taka Ward VI mipuiten ZPM Party Candidate H.Lalremtluanga an thlan tlina avanga lawmthu sawina hun a hmang a, Corporator thar H.Lalremtluanga pawhin thu sawiin, “Pathian leh mipuite zarah thlan tlin ka lo ni hi ka lawm hle a, theih tawpa min tawngtaisaktu leh Party Worker te thawhrimnaah lawmthu ka sawi a ni. Pathianin min hruai ang a, Ward VI mipuite hmasawna turin theih tawp ka chhuah dawn a ni,” a ti bawk.
Nimina chhung inkhawm hi Chalkhuma, Adviser chuan a kaihruai a, K.Lalrinsiama, Secretary chuan hunserh hmangin Party Spokesman K. Laltluangkima chuan Chief Minister Lalduhoma chu USA Mizo (Mizo Society of America) ten Mizo Day hmang tura an sawm angin Sept.2,2024- ah USA a kal dawn thu a sawi a, AMC Ward VI inthlan dawna MNF leh Congress-ten Home Minister thlalak an hal chu a dem thu a sawi ve bawk.