Keini huna thawhtan zan rei lam khan US Open 2024 khelh tan a ni a, a ni khat niah mipa lamah champion lai leh champion tura rinkai Novak Djokovic a chak nghal. Djokovic a chak lai hian player langsar zinga mi Dominic Thiem a chak lova, Grand Slam a hmachhawn hnuhnun ber turah first round a paltlang zo lo.
Grand Slam-ah a vawu 25-nan champion tuma tan khawh Novak Djokovic hian World no 138 Radu Albot hmachhawnin bul a tan a, harsatna lian a tawk lo. A khingpui Albot lakah hian set khatna leh set hnihnaah break a nei zawn a, set hmasa pahnihah hian game hnih ve ve hloh chungin set a la.
Awlsam taka set hnih a lak zawn hnuin Djokovic hian set thumnaa fiahna hautak zawk a hmachhawn. A khingpui Albot a rawn khel tha chho a, an inkhel tawk ta hle. Game an inlak chhawn zak zak hnuin Nole hian break pawimawh tak a nei thei hram a, break a neih chhawr tangkaiin set a lak nawn leh theih phah. World no 138 Radu Albot lakah hian 6-2, 6-2, 6-4 in hnehna a chang a, second round a inhlangkai. Second round-ah Laslo Djere a hmachhawn zui leh ang.
Grand Slam-ah vawi 24 zet champion tawh Novak Djokovic hian a record siam tizau turin Grand Slam-ah vawi 25 champion tumin tan a khawh mek. Grand Slam-ah vawi 25 a champion thei a nih chuan mipa leh hmeichhe zingah Grand Slam-a vawi 25 champion thei hmasa ber a ni ang a, Tennis GOAT a nihna a nemnghet leh zual ang. Grand Slam-a champion ngun ber a nih bakah World No. 1 ni rei ber a ni a, ATP final-a champion ngun ber a ni a, ATP Master a champion vek thei awmchhun a nih bakah Olympic Gold Medal a la tawh bawk a, Tennis huangah ani ang reng renga ropui an awm lo. A ropuina ti ropui leh zual turin Grand Slam-ah champion belh a la tum cheu a ni a. US Open-ah a champion nwn leh thei a nih ngat chuan Tennis a thlengchhuak nawn a ni hawt ang.
Djokovic-a’n ropuina ram a pan zel lai hian US Open champion hlui Dominic Thiem chu first round paltlang zo lovin a tla a, Grand Slam a hmachhawn hnuhnung berah a thleng sang zo lo.
US Open 2020 champion Thiem hian thawhlehni khan tualchhung tlangval Ben Shelton a hmachhawn a, set lak nei lovin a tlawm. Shelton hian Thiem lakah 6-4 6-2 6-2 in hnehna a chang. Grand Slam a hmachhawn hnuhnung ber turah beisei a phak lova, US Open atangin a puanthuah a tel nghal. French Open final vawi hnih khel a, Austrlian Open final vawi khat khel tawh bawk Dominic Thiem hian October thlaa neih tur Vienna Open hmachhawn a tum a, he inelnaa a tlak rualin Tennis a chawlhsan zui tura ngaih a ni.
Thawhlehnia inkhel dangah Grand Slam-a la champion lo Alexander Zverev chuan a hnampui Maximilian Marterer a hmachhawn chunga set khat hloh chungin, 6-2 6-7 (5-7) 6-3 6-2 in hnehna a chang. Zverev rual hian Casper Ruud pawhin a khingpui Bu Yunchaokete chu 7-6 (7-2) 6-2 6-2 a hnehin second round a lut ve bawk.