NGOCC vs MIZORAM SORKAR

• Dr. C. Lalrampana

• A KAMKÊUNA

Khawvel hringmite nitin damchhung khawsakna kawnga inzinpawhtawnna leh mamawh inpektawnna hmanraw awlsam leh rang ber chu thlawhtheihna hi a ni hial awm e. Indo nan pawh a thain a tangkai nangiang mai! India ramah Airport Authority of India hi India rama International Airport bakah India rama Domestic Airport-te enkawltu a ni. Airports Authority of India (AAI) hian Airport zawng zawng 137 a enkawl a, heng zingah hian Domestic Airport 103, International Airport 24, leh Customs Airport 10-te a tel a ni. Hetih lai hian Indian Air Force (IAF) enkawl airport 60 chuang a awm bawk. Heng zingah hian Mizoram State zim tê Mihring nuai 12.6 vel lek hian Airport pakhat kan nei ve mek a; enkawl lah chu a hautak phian mai a, Ministry apiangin mahnia enkawl an huphurh vek a ni ber mai. Lengpui Airport hi Congress sorkar lai December 12, 1998 khan Deputy PM LK Advani khan a hawng a, tunah kum 26 a ni ta mek a ni.

• A HAUTAK EM?

Hautak tehreng mai! Kum 2020-2024 kum 4 chhung khan Rs 100vbc State sorkarin Airport enkawl nan hian a chawi belh a. A runway PCN 36 leka siam tha tur pawhin Rs 50vbc sen belh a la ngai dawn. State-in sum thawh chhuah a nei mumal si loh lai kara enkawlna senso a san êm avang hian kum 2004-2022 thleng khan MNF & Congress Ministry-te khan AAI kuta hlan tumin hma an la thin a; MOU hial duan hman a ni a, mahse, tun thlengin a hlawhtling rih lo a ni. Hei vang tak hian 01-02-2024 khan Sorkar chuan a zir chiang turin Working Committee a din a, he Committee hian 31-08-2024 khan CM hnenah Report an theh lut tawh a ni. He Committee hian AAI kuta hlan ai chuan IAF kuta hlan hi a hlawk zawkin a ngai a, chik taka thlirin a hlawk zawk reng bawk a ni. A hautaka State sorkarin a phurh zawh bawk si loh chuan leh AAI-in lak a chak bawk si loh chuan IAF kuta hlan vat mai hi kan tihtur tha ber chu niin a lang. Phurh zawh loh nghawngkawl inbahtir reng hi hahthlawnna mai a ni. Khing Rs 150vbc chawibelh ngai thin turte khi IAF kuta a awm chuan kan hum thei dawn a, development dangah a hman theih dawn a, kan ram tan a tangkai daih zawk dawn a ni.

• NGOCC THUCHHUAK

NGOCC-in Lengpui Airport IAF kuta hlan tur anga ri rêt rêt a hriat avangin August 9, 2024 (3:00pm) khan Central YMA Committee Room-ah meeting neiin Lehkha No. NGOCC/2024/9 of 2024 hmangin IAF kuta Lengpui Airport hlan an remtih loh thu thutlukna an chhuah hmiah mai a. An lehkha atang hi chuan sorkar aiin an thu zawk hmel khawp mai! MPCC Vigilance Cell leh MNF Publicity Board hruaitute lahin Media lamah NGOCC thlawp zawngin an lo pau ve nghal vat a. Hetianga inthuruala IAF kuta dah an phal lo tak tak a nih chuan Airport enkawlna tur senso tur hi NGOCC leh eptu party-te hian thawh khawm mai thin se a tha ang a? han ti dawn ila kum 4 chhunga senso tawh Rs 100vbc pawh kha Mizoram mipui chhiah pek tlingkhawm atang thova hmanral a ni si a; kan zavaiin Airport hi kan lo thuam tha zel thin zawk chu lo niin hetiang rau rau a nih chuan hawh u, kan zavaia sum hek lo zawngin IAF kutah hian dah ngam Mai ang u tih chu rawtna awmze nei ber chu a ni ngei ang.

• IAF KUTA DAH A HLAUHAWM EM?

August 12,2024-a FB leh social Media hrang hranga Airport IAF kuta dah a thatlohna point 14-te kha kan chhiar hlawmin a rinawm. Han en thuak kha chuan a hlauhawmin a that loh hmel hle. Mahse, working Committee zirchianna Report CM-in Virthli daily news a hrilh dan hi a ngai ngaiin han bihchiang ila:

• LENGPUI AIRPORT CHUNGCHANG

1. Aerodrome hi Union List-a awm a ni.
2. Lengpui Airport hi ni 12-12-1998-ah L.K.Advani, Dy.Prime Minister-in a hawng. Kum 26-a upa a ni ta.
3. Kum 2004 atang khan khatih laia Sorkarna chelhtu MNF Sorkar khan AAI hnena hlan tumin hma a la tan a. Congress Sorkarin a chhunzawn leh a. MNF Sorkar a lo din leh khan bawhzui zelin 2022-ah AAI nen Draft MOU an siam. *
4. ZPM a lo sorkar tirh khan a ramri enfiah nghal a ni a. Airport ramri hi vawi thum lai rin nawn a ni a, a zim tual tual a, private encroachment pawh a lo tam hman hle a. ZPM Sorkar chuan a tira a ramri chin dik tak nia hriatah ramri siam tha lehin, tunah hian hung tum mek a ni.
5. Working Committee – Ni 1-2-2024-ah Airport dinhmun zir chiang turin Working Committee, Pu TBC Lalvenchhunga Chairman-na hnuaiah din a ni. He Comittee hian Sorkar hmasain AAI nena Draft MOU an lo siam chu a nihna anga pawm tlak niin a hre lo va. AAI-te chu dawr chhunzawm an ni tho nain clause thenkhat ennawn tura indawrna awm chu AAI atanga chhanna dawn a nih loh avangin reminder thawnleh a ni a, hei pawh hi report thehluh hun thlengin chhanna dawn a ni ta lo a ni. Agency hrang hrang dawra Formal Meeting vawi 7 bakah Virtual Meeting leh Spot Visit-te an neih hnuah, ni 31-08-2024 khan Working Committee chuan CM hnenah Report kimchang tak a thehlut a. Indian Air Force (IAF)-te nena an indawrna chu bawhzui tlak bera ngaih niin, zir chian mek a ni.
6. North East-a Airport-te dinhmun

1) North East-ah hian Airport 18 a awm a. Chung zinga 9-te chu a neitu State Sorkar niin AAI leh IAF-ten an operate thung a ni.

2) Along leh Daporijo hi Defence Ministry ta niin IAF in a operate.

3) Airport 3 – Itanagar, Jorhat leh Agartala-te chu AAI ta niin AAI in an operate.

4) Tezpur Airport hi AAI ta niin AAI leh IAF ten an operate.

5) Guwahati Airport hi AAI ta niin Adani Group in an operate.

6) Silchar Airport hi IAF ta niin IAF-in an operate.

7) Lengpui Airport chauh hi State Sorkar ta leh State Sorkarin a operate awmchhun a ni.

7. Lengpui Airport Senso –

1) Kum 4 chhung 2020-21 atanga 2023-24 hian Rs 100 cr chuang kan chawi belh.

2) 2023-24-ah erawh hi chuan User Development Fee chu Rs 422 per passenger atangin Rs 938-ah tihsan a nih tak avang leh Manipur buaina avanga passenger an pun tak avangin sum lo lut pawh a pung ta deuh.

8. Sum sen belh ngaihnate-

1) Runway hi a tlem berah PCN 48-55 tala chhah a ni tur a nih laiin tuna kan runway hi PCN 36 chauh a ni. Chuta tan chuan a tlem berah Rs 50 cr a ngai ang. IAF-te chuan PCN 58 ni tura siam an duh a, a senso pawh tum vek an inhuam.

2) Runaway hi a khat tawka thawm that (recarpetting) ngai a ni a, vawi khat thawm that nan Rs 25 cr lai a ngai thin. Heihi tunah pawh tih a hun leh hle tawh a ni. IAF-in an enkawl chuan anmahni tih vek tur a ni.

3) ILS (Instrument Landing System) hi Pilot-te khawhmuh (visibility) tifiahtu a ni a. License hi kumin December-ah renew a hun leh tawh nghe nghe a ni. Tuna kan hman lai hi Catgory I chauh a la nih avangin Visibility hi 1700 M-a thui tal a fiah (clear) a ngai a. Chu aia khaw hmuh tawi (poor visibility)-ah chuan tum turin harsatna a awm ta thin a ni. ILS Category II hi vuah thei ila chuan 400 M leka hniam atang pawhin a lang fiah thei dawn a, chhum zing vanga tum theih loh a awm tawh lo vang. IAF te chuan ILS hi International Standard tluk deuh thaw, an mahni sensovin siam an duh a ni.

4) Thlawhna tam zawk leh lian zawk tum theih nan Parallel Runaway siam belhte kan duh hun a la awm ang a, a senso hi keini State ang tan chuan lu tihai tu a tling dawn a ni.

9. Ruahman chhinna tlangpui :

1) A area hi insem tur a ni. ATC, Runaway leh a lehlam pang zawng hi IAF-in an chang ang a, an chan tur ram chu an lei emaw, Lease System emawa pek a ni ang. Ram mamawh belh an neih chuan IAF-in a man a tum ang. An chan chhung enkawl zuina senso an tum ang a, Aeronautic Services – Landing Charge etc-te chu an kutah a lut ang. (Heihi tunah pawh AAI kutah a lut a ni).Family Quarter bakah Sikul leh Hospital-te, mipui chhawr theih turin an siam ang.

2) Runaway leh ATC tel lovin a bak zawng chu Sorkar kutah a awm zui ang a. A enkawlna senso chu Sorkarin a tum ang a, a hlawkna pawh Sorkar sum bawmah a lut ang. Terminal building te, Security te, thlawhna ticket hralh te, Non Aeronautic Service zawng zawng Sorkar kutah a awm zui zel ang.

10. Hma thlir:

1) IAF-te enkawl Airport tam zawk hi a tirah IAF ta an ni sa a, a hnuah Civil-in an tawm te an ni. Lengpui Airport erawh chu a tirah Sorkar ta a ni a, IAF ten min tawm dawn zawk a ni thung. Hei hian danglamna tam tak a nei a ni.

2) Silchar Airport khu IAF ta leh IAF-ten an operate a ni a. Tunah chuan North East-a Airport lun ber 4-na a tling tawh a. Cargo transportation-ah phei chuan India rama Airport 335 vel zingah a tha thlan chhuah 46-na an ni hial tawh a. Mipuiin an chhawr êm êm a ni.

3) IAF ten Airport tihchangtlun an tum dan ang chanve pawh hi keini tan chuan cho rual a ni lo va. Mi dangte chakna kan rinchhan thiam chuan, engtikah emaw chuan International Airport-ah kan la chantir thei ang tih hi Sorkar hmathlir (vision) a ni.

11. Inrawn tawnna

1) Airport hi a khat tawka endik thin a ni a. Tehna chi hrang hrang paltlang tur hian, tlin lo chung chungin Sorkar chuan sum tam tak a sêng lo thei lo va. SASCI leh SEDP atang ringawt pawhin tam tham tak sên a ni mek a. Hei hian thil danga mipui chanvo tur a ei hêk nasa hle a ni.

2) Tuna ruahman chhinna angah hi chuan senso aiin a hlawkna a tam tawh zawk tura ngaih a ni.

3) He ruahman chhinna hi Cabinet-in a ngaihtuah hmain, NGO hrang hrangte nena sawihona neih tum mek a ni a. Politics-a inbeih nana hmang lovin, kan zavaia thutlukna ngaichang chungin Sorkar chuan kalpui a tum a ni.

• A TLÃNGKAWMNA

Airport Kalpui zel dan tur zirchiangtu Working Committee-te Report atanga thlir hi chuan IAF kuta Airport dah hi kan Zoram tan thatlohna leh hlauhawmna êm êm a awm pawhin a lang lo. Sipai discipline anga min kalpui leh kan zavai atan a tha ting zawk ang a. Discipline khauh deuh hnuaia kunte hi mahni inthunun nan a tha hle. International boundary-a awm kan ni a, IAF tan chuan duhthusam a ni ngei ang. Thenawm ramte nen indo a chhuah tak tak hunah chuan AAI emaw midang kutah pawh hlan mah ila IAF chuan a duh hun hunah indo thlawhna tumtir nan a hmang tho tho dawn tih hriat lawk a tha hle. Kum 4 chhung zet indawr a nih tawh hnuah pawh AAI-in Airport hi a la ngam lo a nih chuan a la ngam awmchhun, chawibelh lohna tur IAF kuta dah fel mai loh chu khawdang hawi ngaihna rêng a awm ta lo ni berin a lang. Enkawl a hautak êm avangin MNF sorkar & Congress sorkarte pawh khan an lo buaipui hrep tawh a, ZPM Sorkar pawhin phurrit a ni tih a hmuh chian avangin kawng awm thei ang ang a dap ve ta mek a. Hetih laia political advantages lak tuma eptu party-te’n Sorkar an lo bei leh NGOCC te’n sorkar hmalakna an lo dodal nghal chiam chiam ringawt hi chu thil fuh ber a ni lo mai thei. Chuvangin, kan State dinhmun tleu tak hi ngaihtuah reng chungin Airport hi midang kuta hlan vat mai hi kan tihtur niin a lang ta. Kan chelh (delay) rei chuan kan chawi belh tam tial tial ang a; a tawpah kan dahtawl mai ang tih a hlauhthawnawm hlel lo. Chuvangin, NGOCC pawh hian bengsikin ngaihtuah thaleh se kan State tana tha ber tur zawng chhuak se a lawmawm ngawt ang.