English Premier League club lian Arsenal chuan hun rei tak chhung lak tuma an hel tawh Mikel Merino chu Real Sociedad atangin an la lut ta nge nge a, kum li daih contract an ziahpui.
Arsenal hian Spain midfielder Mikel Merino lak nan Real Sociedad manah £27.4m an pe phawt a, a khelh that dan a zirin £4.2m a pek belh leh thei dawn a bawk a, a man hi £31.6m ang hu a ni. Merino hian Gunners-ah kum li daih contract a ziak phawt a, a contract hi kum khat dang pawh sei theihna tur inremna an ziak tel bawk. Merino an la thei chu Arsenal manager in lawmawm a tih thu a sawi a, thiamna sang tak nei leh tawnhriat ngah thar an nei thar chu punna duhawm tak niin, Merino chu an chhawr tangkai hle tur thu a sawi.
Gunners midfielder thar Mikel Merino hian EPL club Newcastle United-ah a lo khel zuai tawh a, EPL-ah a hming a chher lian zo lo thung. Real Sociedad a zawm hnuin a khel tha zo ta viau a, EPL-ah lian zawka hming chher thei turin Arsenal a zawm leh ta a ni. Arsenal a fiahna hautak hmachhawn tur Merino hian Spain tan vawi 28 a khel tawh a, Euro 2024-a an champion tum khan a khel tha viau a, quarter-final-ah Germany an hnehna goal a thun nghe nghe. A club thar Arsenal-ah hian hmun nghet chan a harsa dawn a, Rice, Jorginho, Thomas Partey leh Martin Odegaard te nen an inel dawn a. Thenkhatte nen an inel laiin thenkhatte nen erawh fuh takin an inkawp thei dawn thung.