Nimin khan Hachhek Constituency Development Committee (HCDC) chuan C.Lalnuntluanga, Chairman leh Aldrin Pachuau Vice Chairman hoin Hachhek huamchhung kawng chhia chungchangah Vanlalhlana, PWD Minister a office-ah hmuin, hachhek bial chhung kawng chhia chungchang an sawipui.
Minister hnenah hian HCDC-te chuan hachhek huamchhung kawng chhiatzia leh dam loh leh emergency thilah pawh kal hleih theih loh khawpin kawng hi a chhia a, kan mangang takzet tawh a ni an ti a. A rang lama kawngchhia siam that a nih loh chuan harsatna nasa zawk tawh an hlauh thu an thlen bawk. Tin, hachhek kawng chhe thlalak Print-in Minister hi an pe bawk a. A rang thei ang ber a kawng siamthat sak turin minister hi an ngen a ni.
Minister chuan an theih ang tawk a kawng siam that an tum thuin a lo chhang a. Fur ruahtui a tamin tun dinhmunah chuan hmalak zung zung a harsa a. Leivung paihin hun kan hmang a ni rih ber e a ti. Fur ruahtui hul hunah a tha thei ang ber a Mizoram kawng siam that an tum thuin a lo chhang a ni, tiin HCDC te hian thuchhuah an siam.