- Vanlalzawma, Muallungthu
Mihring mizia leh nunzia hriatchianna ṭha tak pakhat chu thuneihna an han neih a, thuneitu dinhmun an han chelh chiah hian hriatfiah a awl an ti fo a. Chu thuneihna chu a hniam emaw a sâng emaw, amah; thuneitu mihring mizia phak tâwk aṭanga tehin, amah aia dinhmun hnuaihnung zawka awmte chunga a khawsak duh danah a langchhuak chiang viau ṭhin a ni awm e.
Thuneitu dinhmuna ding, thuneihna hman dan ṭhiamlote aimaha thil huatthlala leh ngaimawhawm, thil pawi tak thlen thei ni ve bawk si chu thuneitute laka tlaktlum duhna avanga hotute tlawna, an laka tlaktlum duhna avanga a-rûk a-râla mahni thawhpuite kher ching, chunglêng leh hnuaileng indo thawnthua Bäk ang maia chet ching ho hi an ni fo mai. Heti ang mi hian khawi-i hmunah pawh thawhhona an ti chhia a. A rûka innghirnghona chawk chhuakin; thawhpuite nena inlungrualna an hnawt ṭiau ṭhin.
Chuti ang mite chuan anmahni ṭanghma chiah an ngaihtuah a. Thawhhona kârah boruak chhia an siam a. Lungrûal taka thawhhona nun an tichhe ṭhin. Chu boruak chu hotu; thuneihna humtu kha mifing var vâk lote an lo nih phei chuan an thliar thiam lo a, chuti ang mite bäwl-phawn theih chuan an awm ṭhin. Chuvang chuan, thuneitu chuan an thuneihna an hman khawloh phah thei a. An thuneihna hmangsualin duhsak zawng leh duhsak loh zawng an neih phah a. Chu chuan thuneitu ni si, rorêl thiam lo takah hotu chu a siam ta ṭhin a ni.
Chuvang chuan; thuneitu, hotu chan chang chuan a dëra amah betlawntute avangin rorêl a thiam loh phah fo ta thin a. Mifel tαk tαkte felnα pawh α hmu thei lo fo a, a mit chu tihdelin a awm tlat tawh ṭhin. A bula chetlâ, amah tlawntute fakdêrna chiah kha a thu hriat tam anih avângin a khawhawi a zîm lo thei ta lo ṭhin a. Chuti ang mite thu leh hla chu a pawm a, a awih ṭhin avâng chuan a mit a meng zau tawk thei ta lo a. A khaw-hmuh a tawi a, thil thlir dan a thiam ta lo ṭhin a ni. Chuvâng chuan, mi ṭhα leh dikte pawh mi ṭhα lo leh dik lo αngin a hmu ta tlat zawk ṭhin a, a mit leh beng a vâr zo tawk ta lo ṭhin a ni. Thuneihna leh hotu dinhmun luahtu ber anih si avangin leh a hmalâkna kawng tinrengah, a mawhphurtu ber anih miau avangin a hnunglamah mi huat leh dem te, rorêl thiam lo thuneihna chelh si, a rûka mi nuihzat anih phah thei ṭhin.
Hmaichhana amah fαk α, tlαwn α, ngαisαng αwm taka a dëra amah be tlawntute thu chu a zâwm a. Hotu a nihna angin thil reng reng lâi takin a thlir thiam tawh ṭhin si lo a. Hotu a nihna anga rorel pawh a thiam tak si loh avângin a mualpho phah ta ṭhin a ni. Α bula khawsa, amah be tlawntute thu a awih tam poh leh a mualpho tam mai a. Ṭawng loh tura ngaihah a ṭαwng tαm a. Mi pαwi α sαwi tam α. A tlawntute chu mi tlem zawk an nih ṭhin bawk si avângin amah hawtu pawh an tam phah ta zawk ṭhin a ni.
Chuti ang mi chuan a duh ber chu α thuneihna nasa lehzuala chelek a, midangte hnuaihnung taka thunun a ni a. A αiα hnuaihnung zawk te chungah nasa lehzual zawka thuneihna chelek kha nuam a tiin a duhdan a ni ṭhin. A duhdan anga thil a kal lohin lungαwinα α hmu lo a. Thawh ho dan thiαm lo anih phah ta ṭhin a ni. Mifing var vâk lo anih phei chuan a bula miten an duh ang angin an bâwl kual a, mualphona erawh ama chanpual a ni ṭhin si. Chu chu a hrethiam pha ṭhin lo a. Hotu mawl, rorêl thiam lo, thil chinchang hre bawk si lo dinhmunah a ding ta mai ṭhin a ni.
Α thuneihna a hriat lutuk luαtαh a hnuaia mite chungah a inluling fo a. Chuvang chuan, a rukin amah hαwtu α ngαh a. A thuneihna chelek nasat a tum luαtαh α hring-nun-phung a hniam phαh fo bαwk. Α inlulin nasat apiangin hαrsαtnα α hmαchhαwn tam α. Fαk hlαwh nih α duh leh tho ṭhin si avangin a che phelh a, miin an dem α, amah bâwl kualtute hming lang tawh loin amah chiahin mi huatna leh demna a hlawh ta ṭhin a. A hnunglamah miin an nuihzat duh fo.
Hei hi hringnun-a thuneihna, hotu nihnain a ken tel ‘ze’ chikhat a ni a. Kan sawi bakah pawh hian he hringnun hian ken tel chi hrang hrang a nei ang. Tawp chin lêm nei loa sawi tur a tam viau thei ang. Engpawh chu ni se, hei hi hringnun-a ze pakhat, mi tam tak zinga mi ṭhenkhatten kan nunpui ṭhin chu a ni si a le! He hringnun teh rêng hi chu aw!