Chawlh kar tawp khal Europe-a tualchhung league lian zual panga te khelh chhunzawm a ni a, inkhel hmuhnawm tak takah hnuhma thar eng emaw zat a awm thar. Kar tawpa football hnuhma langsar zual kan hrut kual leh ang.
- English Premier League
Inrinni zan khan champion lai Manchester City chuan Etihad Stadium-ah kai thar Ipswich Town an mikhual a, 4-1 in an chak. An mualah awlsam taka an chak tum hian Erling Braut Haaland chuan hattrick a siam. Haaland hian EPL-ah hattrick vawi sarih a siam tawh a, EPL a Wayne Rooney hattrick siam zat a tluk chiah a. Haaland leh Rooney te hi EPL-a hattrick siam tam lamah pa sarihna an i dun mek.
Manchester City in awlsam taka hnehna an chan laiin Manchester United erawh chu Brighton hneh lovin an tlawm ve thung. United lakah Brighton chakna goal hi hun pek belh minute 90+5 a João Pedro thun a ni. United hian kum 2022-23 hnuah minute 90 hnu lamah goal ruk ngawt an chhuah tawh a, EPL team zingah minute 90 hnu lama goal chhuah tam ber an ni.
Pathianni zan khan London club lian Chelsea chuan Pathianni zana an khingpui Wolves chu 6-2 ngawtin an sawp. He inkhelah hian Chelsea tan Noni Madueke chuan hattrick a siam. Madueke hi EPL-ah Chelsea tan hattrick siam thei 23-na a ni a, Chelsea hi EPL-a hattrick siam thei player nei ngah ber an ni.
Pathianni zan khan Liverpool chuan Anfield-a an mikhual Brentford chu si hnih faiin an hneh. Brentford an hneh tumin Reds hian ball pass dik 92% zet an nei a, hei hi tiang lam record awm tan kum 2003-04 hnu lamah EPL match khata pass dik ngah ber record thar a ni.
Liverpool hian manager thar Arne Slot an nei thar a, an manager thar Slot hnuaiah EPL an match hmasa pahnihah an chak zawk. Ajax manager hlui Arne Slot hi Liverpool manager zingah EPL match hmasa pahniha hnehna chang zawn thei hmasa ber a ni.
- Spanih La Liga
Pathianni zan khan champion lai Real Madrid chuan an mikhual Real Valladolid chu si thum faiin an hneh. He inkhelah hian Real Madrid player thar Endrick chuan Endrick chuan minute 90’+6-ah goal a thun. Kum 18 leh ni 35-a upa Endrick hi Real Madrid tan an khelh hmasak bera goal thun thei naupang ber a ni.
Kum 2015/16 hnu lamah Atletico de Madrid chuan free-kick atangin goal 10 a thun tawh a, heng zinga goal 9 zet hi Antoine Griezmann thun a ni. Griezmann hian Pathianni zana Girona an hneh tumin free-kick a chhuih goal.
- Italian SERIE A
Inrinni zan khan Inter Milan chuan 2-0 in Lecce an hneh. He inkhelah hian Hakan Calhanoglu chuan penalty atangin goal a thum. Turkey player ropui Calhanoglu hian penalty vawi 17 a chhuih atangin goal a thun vek. A hnuai chiahah hian penalty chawi 11 pet a, vawi 9 pet goal tu Cole Palmer a awm.
- German Bundesliga
Season thara an khelh hmasak berah Bayern Munich chuan Mimualah VfL Wolfsburg chu 3-2 in an hneh thei hram. German club ropui Bayern Munich hi season thara an match hmasa berah season 13 zet chu tlawm an ei tawh lo. Season thara an match hmasa berah vawi 11 an chak a, draw vawi hnih an nei.
VfL Wolfsburg an hneh tum hian Bayern Munich player ropui Thomas Muller chuan Bayern tan vawi 474 nan a khel a, Bayern Munich tana khel tam ber record thar a siam.
- Messi & Ronaldo
Lionel Messi chu hliam tenau a neih vangin a la awl rih. Hetihlai hian Al-Nassr tan Cristiano Ronaldo a khel tha ve thung. Cristiano Ronaldo hian Saudi Pro-League season thara an match hmasa berah Al-Raed nen 1-1 a an inhnehtawk tumin hmahruaina goal a thun. Ronaldo hian kum 18 chhung zet chu club leh ram tan kum khat (Calender year) chhungin goal 25 aia tam a thun vek a. Kum 2006 atanga 2024 chhungin kum 2022 ah chuah club leh ram tan goal 25 a thun tling zo lova, hemi kum hian goal 16 chauh a thun.