Nimin khan Vanapa Hall-ah Art and Culture department buatsaihin 68th Batch IMFA Graduation Day hman a ni a, C Lalsawivunga, Minister, Art and Culture Department chuan khuallian niin a hmanpui.
C Lalsawivunga chuan,”Mizo kan nihna hi chapo pui lovin kan chhuang tur a ni a, zai leh lam a ni emaw lemchan lam a ni emaw kan talent neih ang angte tihmasawn a, pho chhuak zel turin kan in chah a. Hnam changkang apiangin an hmam zia an ngaisangin an chawisang thin a, an chhehvel hnam zawng zawngah an hnam zia pho chhuak turin tan an la thin a, an nun phung mai bakah an ei leh in chenin khawvel mit hmuhah an pho chhiak thin a ni,”a ti a. “Kan culture hi khawvel hmun dang a miten an hriat ve theih nan cultural event kan neih ang angte kan ngaih hlut deuh deuh a pawimawh a ni,” a ti.
Art & Culture Department Minister chuan,“Mizote hi pi leh pute atanga zai leh lam ngaisang hnam kan ni a, hei hi hlamchhiah mai lovin tuai thar zel ang u. Khawvel miten mizote min hriat ve theih nan a kawng awlsam ber chu kan culture a tam thei ang ber kan pho chhuah ve a ngai a ni,” a ti a. “Kan society-a bet tlat aia upa zah leh tlawmngaihnate hi vawng nung zel ila, chhiatni thatni a kan intanpuina kawngahte leh mi harsa zawkte ngaihsak kawngah te hma kan sawn zel theih nan tan i la thar bawk ang u. Miin a Culture a zah pui a, ama nun atanga a hnam nun zia a hloh chuan a boral tihna a ni. Kan culture kan zahpui a, kan society-ah leh kan khawsak hona kawng hrang hrangah kan pi leh pute atanga kan chhawm nun dan mawite kha kan hloh zel a nih chuan kan hnam hi a boral mek tihna a ni. Thiamna leh hriatna kawng hrang hrangah kan sang zel a, chutih laiin kan hnam nun zia te kan chawikan zel theih nan tan i la thar zel ang u,” a ti bawk.
He hun hi Carol VLMS Dawngkimi, Director, Art and Culture department chuan kaihruaiin, zaithiam zai leh hnam lam hmuhnawm tak tak entir a ni a, Lalchuailova, Deputy Director, Art and Culture department chuan lawmthu sawina hun a hmang bawk.