August 27, Thawhlehni khan Spanish La Liga 2024-25 khelh chhunzawm a ni a, inkhel hmuhnawm takah Barcelona chuan mualneitu Rayo Vallecano an hneh. Barcelo tan a inlan hmasak berah Dani Olmo chuan goal a thun nghal. Thawhleh zana inkhel dangah Mallorca leh Sevilla te goal awm lovin an inhnehtawk.
Season tharah vawi hnih chak zawn tawh Barcelona hi Rayo Vallecano hmachhawn turin Estadio de Vallecas-ah an leng lut a, an len luhna mualah goal chhuah hmasa zawkah an tang. Goal chhuah hmasa zawkah tang mah se huaisen takin an inlan a, chawlhlawk hnu lamah goal hnih thunin an khingpuite an lehthal.
Rinkai lo zawk Rayo Vallecano hian beisei aia thain bul an tan a, inkhel tan atanga minute kuana lekah Unai López chuan hmahruaina goal a thun. Hma taka goal an thun vangin an phur a, team lian Barcelona lakah inrintawkna sang tak an nei zui bawk. Catalan club lian hian an si phurh sut tumin tan an khawh nasa viau a, hlauhawm siam thin mah se darkar khat dawn si phurh zawkah an tang.
Hnufual zawk an nih reng hnuin Barcelona in goal an thun ta nge nge, minute 60-naah Pedri chuan goal thunin an si phurh a sut. Goal khat ve ve an thun hnuin inkhel a hmuhnawm zual sauh a, goal thun tumin an innawr tawn nasa hle. Chawlhlawk hnu lama mual chhunga lut Dani Olmo chuan minute 82-naah a club thar FC Barcelona tan a goal hmasa ber thunin Rayo Vallecano lakah hma a hruaipui. Barcelona player thar Dani Olmo goal thun hmangin Barca hian hnehna an chang a, Mimualah point thum hlu tak an hmu.
Season liam taah Real Madrid el phak lo Barcelona hi season tharah an khel tha tluang viau rih a, vawi thum khel tawhin an la chak vek. Point hmuh theih zawng zawng la hmu rihin table chung berah an awm a, hmahruaitu thar an ni.
Barcelona hian an academy La Massia atanga inzirchhuak Dani Olmo hi German club thang duang RB Leipzig atangin an la let a, a manah 60m euros (£51m) an seng. August thla tir lama an lak luh mah nise Barca hian an tana khel turin an ziak lut thei mai lo thung. Midfielder Ilkay Gundogan-a’n Manchester City a pan a, Atletico Madrid lamah defender Clement Lenglet a chhuah bawk vangin Barca hian an ziak lut fel thei a. Rayo Vallecano lakah a vawi khat nan inlan in, chakna goal a thun zui ta a ni.