US Open 2024 khelh chhunzawm zel a ni a, champion lai Novak Djokovic chuan harsatna lian tawk lova a hnampui Laslo Djere hnehin third round a lut. Ningani zinga inkhel dangah Andrey Rublev-a’n tlawm a pumpelh a, hetihlai hian Holger Rune a tla ve thung.
Olympic Gold Medal a lak hnua inelna a hmachhawn hmasak berah Djokovic a khel tha tluang a, phu takin a chak zel rih. Grand Slam-ah vawi 24 ngawt champion tawh Nole hian second-ah Serbia player ve bawk Laslo Djere a hmachhawn a, set thum khel tluan lova hnehna changin third round a lut a. Third round-ah Australian 28th seed Alexei Popyrin a hmachhawn zui leh ang.
Djokovic hi a hnampui Djere lakah a khel tha fal bik lova, awlsam taka chak a ni bik lo. Hmuhnawm taka set khatna khelin, an inhnehtawk nghal hle. Game inbuktawk takah Djokovic hian break a neih a chhawr tangkai a, game li hloh chungin set hma a la.
Set khatna a lak hnuin set hnihnaah Djokovic hi a khel tha zui lo viau a, a serve a hloh hmasa. A khingpui Djere hian a break nawn teuh viau a, set a la hman teuh hle. Dinhmun derthawng taka a din laiin Djokovic huaisenzia a lang nawn leh a, a serve a hum hram huin break a nei let. Inkhel hmuhnawm takah chungnung zawkah a tang nawn leh hram a, set a la nawn leh.
Set hnih a lak zawn hnuin Djokovic a khel tha zui a, 2-0 in hma a hruai hman. 2-0 a hma a hruai lai hian a khingpui Djere hi dulthuar na vangin a khel chhunzawm thei lova, inhnukdawk. A khingpui a inhnuhdawh vangin Djokovic hian rin aia hmain hnehna a chang a, 6-4, 6-4, 2-0 a hnehna changin third round a lut zui ta a ni. Djokovic hi US Open-ah vawi 90 a chak tling chiah a, mipa lamah Grand Slam pali-ah vawi 90 chak vek thei awmchhun niin record thar a siam. Nole-a’n third round-a a hmachhawn tur Alexei Popyrin hian second round-a a khingpui Kwon Soon-woo 7-5, 6-2, 6-3 in a hneh.
Ningani zinga inkhel dangah Andrey Rublev chuan Arthur Rinderknech a hmachhawn a, set hnih a loh hmasak zet hnuin set thum a la zawn a, tlawm a pumpelh hram. Grand Slam-ah semi-final la khel ngai lo Rublev hian a khingpui Rinderknech lakah 4-6 5-7 6-1 6-2 6-2 in hnehna a chang.
Russian Andrey Rublev rual hian fourth seed Alexander Zverev pawhin hnehna a chang ve bawk a, Olympic a champion tawh, Grand Slam-a la champion lo Zverev hian a khingpui Alexandre Muller chu 6-4 7-6 (7-5) 6-1 in a hneh.
Player langsar an chak sup sup lai hian Norwegian eighth seed Casper Ruud chu France player Gael Monfils a hneh lova, Monfils lakah hian 4-6, 2-6, 6-2, 6-7 (7-3) in a tlawm a, third round a lut zo lo.