August 29, Ningani khan RG Stadium, Mualpuiah LZ Juice MPL 11 Round 8 khelh tan a ni a, hmahruaitu Chanmari FC chuan Ramhlun Athletic FC lakah awlsam takin hnehna an chang a, an hmahruaina an tizau. Ningania inkhel dangah FC Bethlehem chuan champion lai Mizoram Police FC lakah point an hlawhchhuak nawn leh.
MPL 11-ah tlawm nei lova kaltluang mek Chanmari FC hian Ningani chawhnu dar 2:00 khan round 7-naah 6-1 ngawta an lo sawp tawh Ramhlun Athletic FC an hmachhawn nawn leh a, 3-0 a hnehna changin, point thum an hmu nawn leh. Ramhlun Athletic FC an hneh tum hian Chanmari FC tana khel tha tak KC Malsawmsanga chu Kuriz man of the match ah thlan a ni.
Chanmari FC leh Ramhlun Athletic FC te hi round 7-naa an inkhelh tumin goal sarih ngawt a lut a, round 8-aah erawh goal thum chauh a lut a, goal a lut har viau bawk. Inkhel hmuhnawm takah hian goal lut a awm thei lo reng a, darkar khat chuang zet goal thun thei an awm lo. Hun rei tak goal lut a awm theih loh hnuin Lalrokima chuan minute 61-naah Lalrokima chuan hmahruaina goal a thun. Lalrokima goal thun hnuin inkhel a hmuhnawm zual sauh a, Ramhlun Athletic FC in tlawm nawn tum lo takin an khingpuite an nawr a, hlauhawm siam thin mah se a tawp an khar tha thei lo thung.
Hmahruaina goal an thun hnuin Chanmari FC an khel tha chhunzawm a, goal erawh an thun belh mai thei bik lo. Hun tawp dawn hnaih minute 82-naah John Lalrempuia Sailo chuan an hmahruaina tizau turin an goal hihna a thun. Hun tawp dawn hnaiah goal an thun belh leh vangin Rramhlun Athletic FC tan beisei a bo tawh viau a, point thum mamawh tak chungin an tlawm leh nge nge dawn niin a lang. Si hnih faia hmahruai tawh Chanmari FC tan hian KC Malsawmsanga chuan hun pek belh minute 90+4-ah an chakna tichiang leh zual turin an goal thumna a thun a. Ramhlun Athletic FC lakah 3-0 ngawtin an chak zui leh ta a ni.
MPL 11-ah Chanmari FC an khel tha tluang hle a, vawi riat khel tawhin tlawm an la nei nei. Khelh riat atang hian vawi sarih ang chak a, an hnuai chiaha awm Aizawl FC nen vawi khat an inhnehtawk tawh. Ramhlun Athletic FC lakah an chak leh tak vangin an hmahruaina an tizau a, Aizaw FC nen an inkarah point nga a tla zep thar leh. Pahnihnaa awm mek Aizawl FC hian vawiin hian SYS FC an hmachhawn dawn a, an chak a nih chuan Chanmari FC nen an inkar an tizim nawn leh ang a, an inthlauhna hi point hnih bawk a ni nawn leh ang.
Ningania inkhel hmasa zawkah table mawngphaha awm mek FC Bethlehem chuan champion lai Mizoram Police FC lakah point an hmu nawn leh. Round 7-naah 5-2 ngawta an hneh tawh Mizoram Police FC lakah FC Bethlehem hian tlawm an pumpelh a, point khat an hmu. He inkhelah hian FC Bethlehem taka khel tha tak Mesak Lalramdinpuia Ralte chu Kuriz Man of the Match-ah thlan a ni.
Champion lai Mizoram Police FC laka point hmu zawn FC Bethlehem hian khel riat atanga point 5 hmuin table mawngphah an luah chhunzawm a, an chung chiaha awm Chawnpui FC nen an point hmuh zat inang bawk mah se goal difference-a chhe zawk an nih an tuar. Chawnpui FC hian Sihphir Venghlun FC an hmachhawn dawn a, an chak lo a nih chuan table mawngphaha awm thei dinhmunah an ding.