Mizo Zirlai Pawl (MZP) leh Mizoram Volleyball Association (MVA) te tangkawpin an buatsaih Inter Higher Secondary Volleyball competition 2024 chu Ningani khan quarter-final khelh zawh a ni a, champion lai KM HSS in semi-final an lut. He inelna hi vawiin hian zawh fel a ni ang.
Champion lai KM HSS hian quarter-final-a an khingpui ZN HSS lakah harsatna an tawk lova, an khingpui lakah hian set thum la zawnin 25-13, 25-16, 25-19 in an chak a, sem-final an lut, KM HSS hian semi-final-ah Golden Harvest HSS an hmachhawn zui leh ang. KM laka fiahna hautak hmachhawn tur Golden Harvest hian an khingpui Pine Mount HSS chu 24-26, 25-18, 25-15, 25-19 in an hneh.
Quarter-final inkhel dangah champion tura rinkai zinga mi St Joseph HSS in an khingpui Durtlang HSS chu 25-13, 25-20, 27-25 in an hneh. Semi-final-ah St-Joseph hmachhawn turin Khawngbung HSS chuan inkhel hmuhnawm takah an khingpui Republic HSS chu 20-25, 25-23, 25-22, 18-25, 18-16 in an hneh ve bawk.
Semi-final hi zing dar 9:30-ah khelh tan a ni ang a, KM HSS Leh ZN HSS an intum ang a. Semi-final hnuhnung zawkah St Joseph HSS leh Khawbung HSS an intum zui ve leh ang. Final hi chawhnu lamah khelh tur a ni a. Final khelh hma hian Mizo player tha rualte team hniha inthenin an inhmachhawn dawn a. Team GIG leh Team D3 ten inhkhel hmuhnawm lantirin entu mipui mit an titlai dawn. Inkhel hi LPS-ah Live a pekchhuah a ni dawn a, Volleyball ngainatute tan en ngei chi a ni ang.