Congress Party chuan nimin khan Congress Bhavan-ah ‘Friday Political Session’ an hmang a. He hunah hian Rosiamngheta, AMC Councellor chuan thu sawiin, “Kalphung thar min zawrh tute hian dap chawpin sorkar min kalpui leh si hi a pawi ngawt a ni. A bu kan nei an ti zawt zawt a, an sorkar hma in an lo nei leh tawp si lova, an pang a dam tawh hi chuan thupha an chawiloh pawhin an daw zar zar mai a. Kalphung thar hi tih hi lo awih vak tawh suh u, dap chawp a nih hi ka tia, thalai pawhin an awih tan viauin ka hria,” tiin a sawi.
Sawi chhunzawmin, “Phuahchawpah future a awm lo, indapchawp a, sorkar kal dan tur bu thar neisa insawi ten a bu an zir chawp a. An Minister in kuminah chuan zirlai admission ti an tam avangin zirlaibu a indaih lo an ti ringawt a, an han ennawna admission ti tlem tum a lo ni leh hlauh sia, an pang a dam chuan an daw reng mai a ni. Kawng te pawh an sawi a, chhuanlam hi an zawng reng mai a, kawng te chu mi sorkar hlim pawhin an lo siam ve tho mai a. Congress, MNF pawhin an lo siam tha daih tawh a, chhhuanlam neia kawng siam tha lo awm chhun chu ZPM chiah an ni. Thil hi an pha zawt zawt mai a ni,” a ti a.
“Pu Duhoma dream te kha kan ngaihtuah thin a, UNO hriatpui drug addict enkawlna centre an tia, drug addict a va mamawh hnem awm em em ka ti a. Chu logic chu han ngaihtuah teh u, awih tur leh tur loh pawh an hre tawh lo. Keini chuan addict centre kan duh lo, kan ramah hian drug addict awm lo rawh se kan duh a lawm. Anni chuan UNO hriatpui tham addict centre an duh a nih chu, kan thalai ten an tihlawhtling ang tih a hlauhawm khawp mai,” tiin.
Min bei min bei an tia, Kan bei reng reng lo che u, in thusawi tawh kan sawi chhawng mai mai a ni. Anmahni thusawi tawh hian anmahni a um ngat ngat mai a ni. Official te kaihruai thei tur politician hriatna nei te he ram hian a mamawh tawh. Pawisa lam hre huam huam ringawt, hmasawnna sawi ila harsa em em, politics hi pawisa siamna ni lovin ram siam nan hmang ila, chutah chuan kan tuchhuan ten nun nawm nan hmang rawh se. Sorkar chuan mipui a enkawl ang a, a tihimdam ang a, hma a sawntir tur a ni a, chutiang lama ngaihtuahna chu a awm lo. Kalphung thar an ti ringawt, sawifiah rawh pawh ti ila tihngaihna an hre lo, definition nei lo a ni. Mawl hi sawifiah dawn ila sawifiah ngaihna a nei tawh lo reng reng, chu mi level-ah chuan an awm a ni,” a ti.
A sawi zelnaah, “Rethei leh hausak hi Pathianin capacity min pek dan a inang lo, chu lai chu ka pawm a ni. Mahse, ka ngaihtuah thin a, rethei te pawh hi nuamsa in rethei rawh se tih hi ka ngaihtuah a ni. A har inti mai thei, kan nun ka chhut a, nitin ka chhut a, pawisa kan thawkchhuak, kan khawn khawm a, kan dah lut zel a, enga tan nge kan tih? Hausa chuan nawm leh zual nan a ni thei, mirethei te chuan damkhawchhuah nan asin an tih. Kan healthcare hian min tuam tha se chuan rethei te pawh hi nuamsa in an retheih ka ring,” a ti a.
“Sorkar hnathawk thla tina sing, nuai la ten medical reimbursement an neih laiin nitin inhlawhfa te payment in zu dam lo va maw le. Kei chu na ka ti asin, i ngaihtuah ang u, i huapzo ang u. Kan Kristian Principle atanga midang te dam tlanna vei khawp hian politics hi khel teh ang u, hnam anga kan dam tlan a ngai. Kan essential comondity te, tax system te khawih ila, dal leh alu man a tlawm lai hian kan kawrchung tepawh hi tax tawh ang u, mirethei in an ha lo, system ngaihtuah a ngai tawh. Chibur thleng phak leh mihausa incheina thleng hian kan khawih a ngai, chu philosphy chuan inthuam ila he ram hi i chhanchhuak ang u.” a ti bawk.
He hun hi C. Rualzakhuma, Secretary, MPCC in kaihruaiin, Rosangliani, MPYCC GS, Sanghrima Chongthu, Secretary MPCC te bakah Lalnunmawia Chuaungo, Sr Vice president ten report an pe bawk.