Lunglei district huamchhung Changpui ram chhunga sanghal thi an hmuh chu inrinni khan Vety department leh Forest department-a thawkte’n a hmunah an enfiah.
Tlabunga Vety department hotute’n an sawi danin, thil awmdan enfiah tura kalten a hmun an thlen hian sa rual thite ruh bak hmuh tur a awm tawh loh avangin African Swine Fever vanga thi an nih leh nih loh finfiahna tur thil pawimawh lak theih a ni ta chiah lo tih an sawi a, enfiahtuten sa ruh an hmuh an chhar khawm atanga a lan danin sanghal thi zat hi a zavaiin 25 bawr vel a tling.
Vety leh Forest department-a thawktute chuan heng sarual thihna hmunhma hi damdawi hmangin uluk takin an sawngbawl thianghlim vek a, hei bakah hian sa ruh an chhar khawm te chu thuk taka lei an laihah an phum tha nghal zel a ni.
Thudawn danin, finfiahna awm lo mah se, nimin piaha hmuh heng sarual thite khua a lum vangin a chhiat chak phah hle nia ngaihna a lian hle a, hei bakah hian a bulhnai velah savawm ni ngeia hriat hniak tharlam hmuh a nih avangin heng hian sa ruang hi an tlan a nih rinna a lian hle bawk.
Bungtlang West khaw pa, Lalthansanga chuan Ningani khan chawhmeh zawnga a ram vahnaah Changpui ram chhung De lui bulah sanghal rual ruang hi a hmu a, an rim a chhe tawhin, an bul hnaia awm pawh a hrehawm tawh hle a, a chhiar theih chinah 17 vel niin a chhiar a, inrinnia department lam miten an enfiahnaah erawh 25 bawr vel nia hriat a ni.