US Open 2024 khelh mekah zirtawp zing khan inlehthalna lian a thleng a, champion tura rinkai Carlos Alcaraz chu Botic van De Zandschulp hneh lovin a tla a, second round a paltlang zo lo. Alcaraz a tlak lai hian World No. 1 Jannik Sinner erawh chu awlsam taka chakin third round a lut ve thung.
US Open champion hlui, kum kal mekah French Open leh Wimbledon-a champion tawh Carlos Alcaraz hi tunlaia player tha bera ngaih a ni a, US Open-ah pawh hian champion turin rin a kai viau nghe nghe. Olympic final-ah Djokovic hneh zo lo mah se ani tluka boruak nei lian an awm bik lo. Champion tura rinkai ber zinga mi a ni chungin a fei zo ta lova, world number 74 Van de Zandschulp lakah set la lovin a tlawm.
Dutch Van de Zandschulp hian player tam takin an hlauh sa Carlos Alcaraz lakah tha chungchuang takin bul a tan. A serve a tha a, a ball vuak let a nain a vaw dik thei em em bawk. Set khatnaah break a nei zawn a, game khat chauh hloh chungin set a la. Alcaraz lakah awlsam taka set khatna a la thei hian mak tih a hlawh phawt.
Chhe taka bul tan Carlos Alcaraz a insiamtha a, hnehna chan let ngei tumin tan a khawh. Set hnihnaah tha zawkin inlan bawk mah se hun pawimawh takah a chesual. 5-5 a nih laiin Alcaraz hian a serve a hum zo lo. Set lak belh theihna hun tha a neih hi world number 74 Van de Zandschulp chuan a chhawr tangkai a, set a la nawn leh. Alcaraz lakah set hnih la zawn mah se chak tur em chuan rin a la kai zo lo thung a, Alcaraz hi a chak let leh mai rinna lian tak a la awm fan.
Set hnih a hloh zawn hnuin Grand Slam hrang pathuma champion thei naupang ber Alcaraz a insiamtha thei tak tak chuang lo. Set thumnaah 2-2 a nih laiin a serve a hum zo lo leh a, dinhmun chhe takah a ding hman. 4-2 hmahruai theihna hun remchang a neih chuan Van de Zandschulp-a’n a chhawr tangkai thei bik lova, a serve a hum zo bik lova, hmahruai fal theihna hun tha a hloh. Game lak ve ve an lak belh leh hnuin Alcaraz a chesual nawn leh a, a tihsual zawn vangin a serve a hum zo lo zui leh. 5-4-a hmahruai mek Van de Zandschulp a chesual duh tawh lova awlsam taka a serve humin inlehthalna lian a thlentir a. Champion tura rinkai Carlos Alcaraz chu 6-1, 7-5, 6-4 a hnehin third round a lut. Third round-ah Jack Dapper a hmachhawn zui leh ang.
Van de Zandschulp lakah set lak nei lova tlawm Carlos Alcaraz hi Wimbledon 2021 hnu lamah inelna liana second round a paltlang zawh lohna hmasa ber a ni a, Grand Slam-ah vawi 15 a chak tluang mek chu tihtawp a ni ta bawk. Alcaraz hian a khingpui lakah ball a vaw tha tawk lova, tihsual a nghah lutuk chu a tlawm chhan nia a hriat thu a sawi. Second round a Van de Zandschulp a hmachhawn tum hian vawi 27 zet tihsual a nei. “Come back ka duh a, come back thei ngei turah ka inngai bawk, Mah se, Phengphe khua a tlai zo ta a ni. Ka khingpui khan a khel tha chungchuang a, chak phu zawk a ni.” a ti.
Olympic a champion zo ta lo world No. 3 Carlos Alcaraz hian Olympic final hautak zet a hmachhawn vangin hun rei zawk chawlh a mamawh thu a sawi a. Chau lawk tak chunga US Open hmachhawn a nih thu a sawi rualin a chak loh chhan chhuanlam atan hman a tum loh thu a sawi tel thung.
Carlos Alcaraz a tlak lai hian World No. 1 Jannik Sinner chu ningani zan khan awlsam taka chakin third round a lut ve thung. Sinners hian second round-a a khingpui American Alex Michelsen chu 6-4 6-0 6-2 in a hneh. He a hnehna hi kum 2024 chhunga vawi 50 a chak tlinna chiah a ni.
Ningania inkhel dangah Russian fifth seed Daniil Medvedev chu Arthur Ashe Stadium ah mit la taka inlanin a khingpui Fabian Marozsan chu 6-3 6-2 7-6 (7-5) in a hneh a, third round a lut. Medvedev a chak lai hian seventh seed Hubert Hurkacz chu Jordan Thompson lakah a tlawm a, second round paltlang zo lovin a tla ve thung.