Nimina Hnam run chhung inkhawm a thu sawitu Prof. F.Lalnunmawia, Ex-MLA chuan ‘ZPM sorkar hian an tum dan leh mipui beisei ang a pha lo chho hle a, ram kaihhruai hi field kotlang atanga duhthu lo sam ang ngawt a ni lo tih an hre chho mek a ni’ a ti.
“ZPM hian an thupui pakhatah ‘ram rorelnaa Pathian ram tun din’ tih neiin ‘Kan tha bik tur a ni a, kan danglam bik tur a ni’ tiin thil tha tih tum tam tak an zuar a nih kha. Tunah an sorkar chuan thla 8 hmel a lo hmu ve ta a, an intiamna te ti hlawhtling tur chuan hun ala reilo deuh bawk nen mipuiin an la ngaichang rih a; chutih rualin ‘Kan ti ve lo ang’ an tihte an tih ve leh tho si avang hian anmahni vote tu mi tam tak an hnual tan mek a ni. Nasa taka MNF sorkar sum puk sawisel thin khan an han sorkar ve a, a puk uar uarah an tang a; Restricted tender sawisel thin khan restricted tender lem leh Departmental work lem an uar chho hle tih chu mipui tî tî a ni. Chutih laiin Aizawl khawpui chhung kawng chhiat ber hun kan tawng mek a ni ” a ti.
“Kalphungthar an sawi làr hle laiin an kal dan erawh danglamna hmuh tur a vang hle a, an Budget pharh hmasak berah opposition an nih laia an lo sawisel thin ang tho an pass a, an kal danah sorkar inrenchem lam an hawi lo a ni. Tin, mipui sorkar din a, Unit system tibo tura insawi thin khan Silpauline tak ngial pawh unit kaltlanga dil a ngai leh si” a ti bawk. “ZPM sorkar hi an han kal rei deuh anga, mi tamtak duhthu sam anga ram hruai harsatzia an hmu chho in a rinawm; chutih rualin kan ram hruaitu hluite thatna tam tak mipuiin an hmuh thiam phah ngeiin ka ring” a ti a.
Prof. Mawitea chuan “Thangthar te khawvelah hian ram hruaitu leh party ten thil tha in tihhmuh ila, thangthar mithiam leh tha ten politics hi luhna tlaka an ngaihna turin political party te pawhin kalphung dik leh tha zawka kal kan intihsiak chhoh zel a pawimawh hle a ni. Chutiangin MNF party pawh kan intuaithar mek a; kan sorkar hun hman liam takah khan tih fuh tawk loh kan nei ang tih kan ring; dik leh tha zawka Mizoram hruai leh turin inpekna thar nen Pathian râwn chunga kan kal phawt chuan zoram mipui support kan hlawh chho leh ngei ang tih ka ring tlat a ni” a ti bawk.
H.Lalthawmliana, EM, LADC, Diltlang South Bialtu ni bawk pawhin thusawiin tluk leh din fawm chung a Pathianin LADC a MNF a la sawrkar tir dan sawiin report a pe bawk a. LTA chuan, “ZPM sawrkar chu inthlan hma a an insawi dan ang lo vekin an kal a ni”, a ti a. “Ramri chungchangah te, Kawng chungchangah te, Hmunphiah chungchangah te leh Restricted tender chungchang a an policy ah te an hlawhchham hle rih a ni” a ti bawk. ZPM sawrkar chu thlariat lek an sawrkar chhungin an kal zel dan tur chu a hriat theih ruak tawh a; sawrkar kal dan hi ngun taka chîk ṭhin turin mipui te a sawm bawk.
Hnam Run chhung inkhawm hi T. Thanzauva Adviser, MNF Gen Hqr. chuan kaihruaiin H. Vanlalruata, Joint Secy MNF Gen Hqr. in hunserh a hmang a ni.