Tun kartawp maia tlangzarh tur ‘Emergency’ film chu Censor Board lamin an la tikhawi tlat mai a, ramchhung politics boruak chhem alh huk thei nia sawi hian boruak a nei lian hle.
PM hlui Indira Gandhi lema chang tur Kangana Ranaut hian thah a vauna a dawn bakah Censor Board member thenkhat te pawhin vauna an tawk nia sawi a ni lehzel bawk nen, engtin tak kalpui zel ang maw, tih chu zawhna langsar a ni mek.
Indira Gandhi-i’n 1975 kum a rampum huap ‘Emergency’ a puan khan opposition party mi leh sa tam tak man an nih bakah press/media zalenna khuahkhirh tel bawk niin, rampum mai chu thim chhah mupin a tuam a ni ber.
Censor Board lam hian a tirah ‘clearance pe tawh mah se, tun dinhmunah ‘Emergency’ film hi tihkhawtlai la ni rihin, board member te zingah vauna thu dengkhawng tak tak dawng an awm avanga phalna pumhlum la tichhuak lova ngaih a ni.