Inrinni zan khan English Premier League 2024/25 khelh chhunzawm a ni a, champion lai Manchester City in hnehna an chan laiin pahnihna Arsenal an chak zo lo. City hian mikhual an nihna London Stadium-ah West Ham United an hneh a. Arsenal hi an mikhual Brighton lakah an chak zo lo thung.
- Haaland leh bawk
Champion lai Manchester City hi West Ham United hmachhawn turin London-ah an zin a, London Stadium-ah 3-1 in mualneitu Hammers an hneh. West Ham laka an goal thum thunte hi Haaland-a thun vek a ni a, City tana goal thun a, hattrick siamtu chu amah tho Haaland leh bawk a ni.
City hian an lenluhna mualah bul an tan tha a, goal an thun har lo. Inkhel tan atanga minute 10-na lekah Erling Braut Haaland chuan Bernardo Silva siamsak atangin hmahruaina goal a thun. Team lian zawkin goal thun hmasa mah se West Ham in si an phur rei lova, an si phurh an sut thuai. Goal an thun atanga minute 9-na lekah City defender Ruben Diaz chuan an lamah a ti-goal palh a, Hammers si phurh a sut sak. Hma taka goal hnih a lut hian inkhel a tihmuhnawm zui viau a, goal thun belh tumin team hnihte an nawr tawn nasa hle.
Inkhel hmuhnawm takah City an khel tha chhunzawm a, chawlhlawk hmain goal an thun belh leh hman. Darkar chanve an khel tling chiah tihin goal hmahruai thuntu Haaland chuan Lewis hnen atanga ball a hmuh chu fuh zetin a pet goal a, hma an hruai nawn lehna goal a thun. Haaland goal hnih thun hmangin City hian 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, West Ham in an si phurh an sut teuh thei hle. Tum hnih ngawt goal post tih per bawk mah se an si phurh an sut thei lo. Goal lut a awm belh theih loh reng hnuin hun tawp dawn hnaih minute 83-naah amah Haaland bawk a inlar leh. Haaland hian Matheus Nunes ball pek tha tak chu fing takin goal-ah a chantir a, City goal thumna thunin hattrick a siam. Haaland goal thum thun hmangin City hian hnehna an chang a, khelh thum atanga point 9 hmuin table chung ber an luah.
West Ham laka City chakpuitu Haaland hian West Ham an hmachhawn hma hian Ipswich Town lakah hattrick a lo siam tawh a, EPL a hmachhawn hnuhnung pahnihah hattrick a siam ve ve. EPL-ah hattrick vawi riat a siamna a ni a, EPL-a hattrick siam hnem palina a ni mek. EPL-a hattrick siam hnem ber chu hattrick vawi 12 siam tawh Sergio Agüero a ni. Haaland chungah hian Alan Shearer (11) leh Robbie Fowler (9) te an awm mek. EPL-ah vawi 69 khel a, goal 70 zet thun tawh Haaland hian hattrick siam tam lamah record siam turin hma lam a pan zel. City goal thun khawl Haaland hian EPL-a season hmasa berah goal 36 thunin EPL-ah season khat chhunga goal thun tam ber record a lo siam tawh a. EPL-a a season hnihnaah top-scorer a ni zui leh bawk. Season kal mekah Haaland hian vawi thum khelin goal 7 a thun tling leh der tawh bawk a, Haaland ropuizia kan hmu nawn mawlh mawlh a ni ber mai.
- Arsenal an vanduai
Inrinni zana inkhel hmasa berah Arsenal an vanduai a, an mikhual Brighton & Hove Albion nen 1-1 in an inhnehtawk. He inekhala sawi zui hlawh ber chu Declan Rice hnawhchhuah a ni kha a ni.
Arsenal hian an mikhual Brighton lakah an khel chhe lo viau a, goal thun hmasa zawkah an tang. Minute 38-naah Bukayo Saka siamsak atangin Kai Havertz chuan hmahruaina goal a thun a, 1-0 a hmahruai chungin chawlhlawk an hmang.
Hmahruai chungin chawlhlawk hman mah se Gunners hi second half-ah an vanduai thuai thung. Second half tan atanga minute lina lekah yellow card hmu tawh Declan Rice chuan hun a khawhral nia ngaiin first referee Chris Kavanagh chuan yellow card a hmuh nawn leh a, Arsenal player pawimawh Rice a hnawtchhuak. Rice hnawhchhuah a ni hian sawisel a hlawh zui hle. A nihna takah chuan Rice hian hun a khawhral hran lo niin a hriat a, a tum reng vangin ball a pet sawn hek lo. Fing thiam takin Brighton player Joel Veltman chuan Rice hi ball a pet ber a, chumi hnuin Rice hi a pet lui zui leh bawk. Chuti a ni chung chuan Chris Kavanagh hian Rice a hnawtchhuak tlat thung. Rice a hnawhchhuah lai hian Brighton player in ball out tawh a pet lui chiam chu card a hmuh lo va, penalty ni ngei tura ngaih pawh Arsenal a pe lo leh bawk. Inkhel a zawh rual rualin Arsenal player hnawtchhuak thei tak Chris Kavanagh hi venhimna hnuaiah lakchhuah a ni zui ta hial a ni.
Declan Rice hnawhchhuah a nih hnu lawkah Brighton an che fuh a, João Pedro chuan minute 58-naah goal thunin an si phurh a sut. Tlem zawk ni mah se Arsenal khel a hmuhnawm zui viau a, goal thun theihna hun tha nei bawk mah se an chhawr tangkai zo lova, an mualah ngei an chak zawh uiawm takin an chak zo ta lo a ni.