Mizoram sorkar chuan nimin khan thuchhuah siamin, kumin hian fur ruahtui a tlak tam avangin Mizoram hmun hrang hrangah chhiatna thleng a tam hle a. Leimin avanga nunna hial chân leh in leh lo chan mi engemawzat an awm a. Hmun hrang hrangah leimin avangin inkalpawhna lamah pawh harsatna tam tak a thleng bawk a. Kumin ruahsur nasa hian kawng hrang hrangin nunphung a ti khaihlak fo bawk a ni. Heng chhiatna thleng te hi sawrkar chuan pawi a tiin a tuartute pawh a tawrhpui takzet a, mipuite harsatna su kiang tur hian theihtawpin hma a la mek reng a ni, a ti.
Khaw chin thlîrtu, India Meteorological Department (IMD) chuan ruah hi la sur chhunzawm zel turin a tarlang a. Kan leilungte a hnip tawh avang leh chhiatna thleng thut thei hmun hrang hrangah a awm avangin mipuite fimkhur ṭheuh turin kan inngen nawn leh a. Mahni in leh a vel a tui kal dan te ennawnin, leimin thei hlauhawm leh chhiatna lian tham thlen thei awm a awm chuan thuneitute hnenah a rang lama hriattir zel turin mipuite kan ngenin kan hriattir bawk a ni. Tin, ruahsur nasa avanga kawng hrang hranga harsatna awm theiah, sawrkar department hrang hrangte mahni mawhphurhna ṭheuh hlen tura theihtawp chhuah turin kan inngen nawn leh bawk e, tiin an thuchhuahah chuan an tarlang bawk.