US Open 2024 khelh mekah inrinni zing khan inlehthalna lian a thleng a, champion lai Novak Djokovic chu third round paltlang zo lovin a tla. Djokovic hian a khingpui Alexei Popyrin a hneh lo. Djokovic a chak loh lai hian player langsar Jannik Sinner leh Daniil Medvedev te an chak thung.
Kum kal mekah Grand Slam-a la champion lo Novak Djokovic hian US Open-ah champion nawn ngei tumin tan a khawh a, Grand Slam ah vawi 25 champion thei hmasa ber nih tumin a bei. Third round-ah Alexei Popyrin hmachhawnin chak thei ngei tura ngaih ni mah se a khel chhe ta viau thung a, a tlawm chiang hle. Popyrin lakah set khat chiah a lak tum hi inelna a hmachhawn tawha a khelh chhiat ber zinga mi a nih thu Djokovic hian a sawi nghe nghe.
August thla tir lamah ATP Masters 1000 title la a, Montreal a champion Popyrin hian inrintawkna sang tak nen Djokovic a hmachhawn a, a khel tha hle. Champion lai lakah a service a tha a, a vaw na em em bawk. Grand Slam-a vawi 24 zet champion lai lakah hian break vawi khat ve ve nei chungin set hmasa pahnih a la. Set hnih a hloh zawn hnuin Djokovic a insiamtha a, awlsam zetin set thumna a la a, Djokovic a ni miau a tlawm pumpelh leh thei mai tura ngaih a ni.
Chak let thei beiseina sang tak nei mah se set linaah a khel tha lo zui leh viau. Nole hian break theihna hun tha a neih a chhawr tangkai thei lo zawn. A hun tha a hloh laiin a khingpui hian a break hmasa ta tlat a, a dinhmun a chhe ta hle. Australian Popyrin hian 5-2 in hma a hruai a, a serve a ni bawk. Awlsam takin a chak tura ngaih a nih hman laiin a serve a hum zo lo. Djokovic hian break a neih bakah a serve a hum zui bawk vangin a inkar tizim hman viau. Game hnih a hloh zawn hnuin Popyrin a insiamtha a, game ruknaah point a hloh miah lova Tennis GOAT Novak Djokovic lakah 6-4. 6-4, 2-6, 6-4 a chakin fourth round a lut zui ta a ni.
Alexei Popyrin lakah a tlawm tum hian Djokovic hian double faul vawi 14 zet a nei a, unforce error vawi 49 zet a nei tling bawk. Heti taka a khelh chhiat vang hian Nole pawh hian inelna a hmachhawn tawha khel chhiat ber tum ni hiala a hriat thu a sawi. US Open-ah hian champion nawn a har teh tlat a, mipa lamah phei chuan kum 2008 hnu lamah champion nawn an la awm lo. Kum 2008 khan Roger Federer a champion nawn a, Federer hnung zui zo an awm rih lo.
Third round paltlang zo lova Djokovic a tlak lai hian World No. 1 Jannik Sinner chuan third round a paltlang ve thung. Australian Open champion Sinner hian third round-ah Christopher O’Connell a hmachhawn a, 6-1 6-4 6-2 a hnehna changin round sang zawk a lut. Jannik Sinner rual hian world number five Daniil Medvedev pawhin 6-3 6-4 6-3 a Flavio Cobolli hnehin fourth round a lut ve bawk. Medvedev hian a thlengtu branch lam inngahna lian Tommy Paul a hmachhawn zui leh dawn. Poul hian Canadian qualifier Gabriel Diallo chu 6-7 (5-7) 6-3 6-1 7-6 (7-3) in an hneh let.