Ni 28.8.2024-a World Junior Championship khel tur zawnna Chandigard University Mohila-a neih zawh takah Ramdingliani chu Under 52 kg-ah India aiawh tura thlan a ni.
Ramdingliani hian Kumin May thla khan Haryana-ah National level Champion Of Champions North Zone a paltlang hnuah August, 2024 khan Kanpur, Uttar Pradesh-ah Champion Of Champions Final round khelin a Champion zui a. Final Selection nei tura koh a niin a tumpuite hneh vekin India aiawh tura thlan a ni. September thla chhung National Camp-ah a awm ang a, World Junior Taekwondo Championships (G7) hi October ni 1 – 6, 2024 hian Chuncheon, Korea-ah an khelh ang.
Pu Lalmalsawma leh Pi Lalchharliani te fa pathum zinga milai Ramdingliani hi Kum 2018 January thla khan Chawnpui Taekwondo Club-ah Taekwondo a zir tan a.
Kum 2019 March thlaah Taekwondo Academy Of Best Friends (TABF) ah a inziak lut a. TABF Instructor Lalinpuia leh Zohmingthanga te enkawlna hnuaiah nasa takin hma a sawn a.
Championship a khelnaah chuan Gold medal a la zel a. Covid -19 hri len lai pawh khan in lamah chawl lovin a pain practice pui thin a. Mizoram Championship Kum 2021 leh 2022 ah Gold lain Best Fighter a thlan a ni a. Taekwondoist te ngaihhlut Champion of Champions title la thei naupang ber niin Kum 14 mi lek niin Title la nghe nghe a ni.
State, National leh regional level inelna hrang hrangah 40 lai ala tawh a ni.
Kum 2023 khan SAI National Center of Excellence, Bangalore a zir turin lak a ni a. Tunah NCOE Lucknow-ah a awm mek a ni.
Ramdingliani medal lak tawh dan:
State level – Gold 15, Silver 3, Bronz 4
National level – Gold 7, Silver 4, Bronze 5
International level – Gold 1, Bronze 1 Best fighter 2021 & 2022
Champion of Champion 2022 Title