LZ Juice MPL 11, round 9-na chu Zirtawpni khan RG Stadium-ah zelh zawh a ni. Zirtawpni a inkhel hmasa zawkah champion lai Mizoram Police FC chuan awlsam takin hnehna an chang a, point thum an hmu. Round 9-naa inkhel hnuhnung berah SYS FC chuan si khat faiin FC Bethlehem an hneh.
MPL leh I Day champion Mizoram Police FC hian round 9-naah champion hlui Chawnpui FC an hmachhawn a, 4-1 in hnehna an chang. MPFC hian Chawnpui FC lakah bul an tan tha viau a, Lalfakzuala chuan minute 13-na lekah hmahruaina goal a thun nghal. Hma takah goal thun mah se hmahruai chungin chawlhlawk an hmang thei bik lo. Chawnpui FC tan hian Lalthanzuala chuan minute 33-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Mizoram Police FC an khel tha lehzual a, goal thum ngawt an thun belh. MPFC tan hian second half tan atanga minute thumna lekah Michael Lalbiaksanga chuan hma an hruai nawn lehna goal a thun. Hma an hruai nawn leh hnuin an khel tha zui viau a, an hawi kir tawh lo. Chawnpui FC in goal thun an mamawh em em laiin MPFC bawkin goal an thun belh hmasa hle. Minute 78-naah R Malsawmtluanga chuan an goal thumna thunin an hmahruaina a tizau a. R Malsawmtluanga goal thun atanga minute thum hnu lekah Lalbiakthanga Hmar chuan an goal lina thunin an chakna a nemnghet zui leh bawk.
Chawnpui FC lakah 4-1 ngawta hnehna an chan tum hian Mizoram Police FC tana khel tha tak Lalfakzuala chu Kuriz Man of the Match ah thlan a ni.
Zirtawpni a inkhel hnuhnung zawk, MPL 11 round 9-na inkhel hnuhnung berah rawlthar team hmuhnawm SYS FC chuan minute 72-naa Andreas Lalhminhmuana goal thun hmangin hnehna an chang. He inkhela goal awmchhun thuntu Andreas Lalhminhmuana hi Kuriz man of the match ah thlan a ni.
MPL round 9-na thleng khelh zawh takah tlawm nei lova kal tluang mek Chanmari FC in point 23 hmuin hma an hruai chhunzawm zel a. Pahnihnaah tlawm nei lova kal tluang ve mek bawk Aizawl FC chu point 21 hmuin an awm a. Champion lai Mizoram Police FC in point 13 hmuin pathumna an luah a, si khat faia table mawngphah luah mektu FC Bethlehem hnehtu SYS FC in point 11 hmuin palinaah an inhlangkai.