Congress Bhavan-a friday political session nimina neihah MPCC president Lal Thanzara chuan, “Tunlai politic a thil awmzia hretute tan chuan muhil thawh harh a hun tawh takzet tih kan hre awm e. Vawiin ni a Congress party a kan awm hi kan vannei a ni tih kan hre lovang tih kan hlau a ni. District Council min petu, UT min petu leh State a min hlangkaitu chu Congress a ni a. Kan State thenawm te el pha leh anmahni ang dinhmuna min din tir tu chu Congress hi a ni a. Rambuai kum 20 kan tuar a, remna leh muanna thlen nana thawk tu chu Congress a ni. Mizorama hmasawnna lian zawng zawng hi Congress sawrkar laia thleng a ni. Swetzerland of the East min tiamtu te min thlenpui chu kan hria a, Bangladesh of the South -ah min dah zawk a, MNF hi kan hotuten i thawhpui tawh lovang u an ti a ni,” a ti.
“Kan CM in khawchhak unaute a duhsak thar ta em em mai hi hriatthiam har kan ti a, chutih lai chuan kan unau Zampui tlangdunga awm te chu ration card atangin a paih leh si a, hei hi ‘Bana kaih’ policy chu em ni? Kan Unau Zampui tlangdunga awm te khuan hei hi mak an ti a, hei hi em ni kalphung thar chu an ti a ni. Hmangaihna mak tak chu a lo ni! “Kan CM hian ‘kan sawrkarah Minister te leh MLA te chenna in chei a ni ve lovang’ tiin a sawi a, mahse an sawi loh angin an chei nasa em em mai a. Hei vang hian em ni oil man an tihsan hi kan ti a ni. Kan sawrkar hi sum leh pai lamah a pachhe ta em em mai te hi thil mak a ni, tunah hian ICU ah Ventilator hmanga nung hram hram ang a ni,” a ti a.
“Missionary pakhat chuan kan rama chhiatna thleng chungchang a sawi a, ‘kan CM hian India rama mi hausa ber fapa te inneih sawmna, vai pathian lem awmna kha a inah a lalut ve awm si a, chuvang chuanin hetianga chhiatna hi a lo thleng a ni ang’ tiin a sawi a ni. Kalphung thar min tiamtu te hian ‘chhiah kan tisang ve dawnlo’ an ti a, tunah hian oil leh thil dangah chhiah an tipung a, an insawi angin an awm lo a ni. Tunah hian Oil man an tihpun tur hi a tipungtu Minister chuan milian leh mite a nghawng dawnlo tiin a sawi a. Chuvangin mi tin te oil man sang avangin buaina siam lo turin a ngen a ni. He thil hi a zahthlak a, oil man ah tax an lekbelh tur hi kum khatah vaibelchhe 90 chuang mipuite hnen atangin min laksak dawn a, mipuite min rawk a ni ber. Tunah hian mi thil chikmi te chuan Central Politic kan thlir chuan Rahul Gandhi Prime Minister a nihna hun hi a hnai zel a ni an ti a. Congress hmalam hun hi a eng em em a ni tih i hria ang u,” a ti bawk.
C Ngunlianchunga, MLA, Vice President, MPCC ni bawk pawhin thu sawi in, “Thlai thar kan lei dawn an ti a, an sawrkar ta a. MNF in SEDP First Installment an sem bang Vaivelchhe 150 ah Health Care ah vaibelchhe 40 an dah a, vaibelchhe 110 chu thlei thar lei nan an ‘DAH’ a, mahse Hmunphiah an lei leh ta chuang lova. A sawi hi chu an sawi mai a, mahse a taka chet hi an ti hleithei lo. An sawi leh an thawh hi a inanglo a ni. Sawhthing tam tak a tam mek a, a hmunah Horticulture Department in a tlawh vek ang an ti a, thla hmasa kha an tlawh hun tura an tih a ni a, mahse tun thlengin an la tlawh lo a ni,” tiin.
“Ruang phurh chungchangah te hian oil man an tisang bawk nen, kan sawrkar rate siam ang hian Ambulance neitute hi an tlan duh dawn lo. Hmanniah Health Minister ka va bia a, ‘Ruang phurhna rate an siam hian Ambulance neitute an tlan duh si lova engtin nge in tih dawn.’ ka va ti a, ‘ka hre tawh bik lo’ tiin min chhang a ni. ‘Ka hrelo’ an ti fai vek mai a, mahse an hotupa ber chuan ‘ka minister te chu an inzirthiam tawh’ a ti a ni,” a ti a.
“Kan CM sawi ngei hian VIP Culture kan ti bo dawn a ni tiin a sawi a, hmanni lawka AMC Bye Election ah pawh khan kan CM hi a Escort te nen an rawn kal a, inkhawm naah te pawh sawrkar lirthei a keng zel a ni. Hetiang thil hi tunhma in a thleng ngai lo. Tuna kan sawrkar hi enchhin mek, ‘Enchhin Sawrkar’ an ni a. Mi thil hre lo ten an la tan hle a, mahse hun a kal anga, an chan hi a chhe telh telh dawn a ni. Tunah hian kum 5 chu engtin tin emaw an inbangkai ve mahna, mahse bel keh phuar khawm ang mai an ni a, an daih rei dawn lo a ni,” a ti bawk.
He hun hi MS Dawngliana, Secretary, MPCC chuan a kaihruai a, Congress party a lawmluh pualin Zoengsanga, MCS(Rtd) chuan thu a sawi bawk.