September 8, Pathianni zan khan UEFA Nations League khelh chhunzawm a ni a, an khelh hmasak bera chak zo lo European champion Spain chuan hnehna an chang ve ta a, 4-1 in an khingpui Switzerland an hneh. Inkhel dangah Ronaldo goal thun hmangin Portugal an chak ve bawk.
- Spain an inlar
Euro leh Nations League champion lai Spain hian season thara an match hmas berah Serbia an hmachhawn a, beisei an phak lo. Serbia nen hian goal awm lovin an inhnehtawk ringawt. An match hmasa berah chak zo lo mah se an match hnihnaah erawh hum rei tak chhung kim lo chungin khel mah se phu takin hnehna an chang a, point thum an hmu ve ta nge nge. Switzerland lakah Spain tak tak an inlar a, an phu ang ngeiin hnehna an chang.
Spain hi Switzerland hmchhawn turin Stade de Genève-ah an leng lut a, an lenluhna mualah an nghal hle. Inkhel tan atanga minute lina lekah Joselu chuan hmahruaina goal a thun nghal. Hma takah goal an thun vangin Luis de la Fuente team in inrintawkna sang zawk an nei a, goal pawh an thun belh leh thuai. Minute 13-na lekah Fabián Ruiz chuan an goal hnihna thunin an hmahruaina a tizau. Hma takah goal hnih thun mah se Spain tan chanchin tha lo a thleng tlat thung a, minute 20-naah defender Robin le Normand hnawhchhuah a ni. Inkhel hun rei zawk kim lova an khelh dawn vangin an chak zawh loh mai hlauhthawnna lian tak a awm. Tam zawk an nih hnuin Switzerland tan Zeki Amdouni chuan minute 4-1 ah goal thunin an si phurh a sut then a, hei hian Spain thin a tiphu rang leh zual.
Kim lo zawk ni mah se chawlhlawk hnu lamah Spain an khel tha zui viau a, goal hnih hmangin Europe champion nih an phu zia an lantir. Spain tan hian Fabian Ruiz chuan minute 77-naah goal thunin an hmahruaina a tizau a. Ruiz goal thun atanga minute thum hnu lekah Ferran Torres chuan an goal lina thunin an chakna a nemnghet zui leh bawk. Spain hian tlem zawk ni chungin hnehna lian an chang a, Group 4-ah pahnihna an luah chhunzawm. Spain pahnihna an luah chhunzawm laiin vawi hnih tlawm zawn tawh Switzerland hian table mawngphah an luah nghet ve thung.
League A, Group 4-a inkhel dangah hmahruaitu Denmark chuan si hnih faiin an mikhual Serbia an hneh a, hmahruaina an sawh nghet. Denmark tan hian Albert Gronbaek Erlykke leh Yussuf Poulsen ten goal khat ve ve an thun.
- Portugal chakna Ronaldo
League A lama inkhel dangah Portugal chuan Estádio da Luz, Lisbon-ah Scotland an mikhual a, an mikhual lakah hma taka goal an chhuah hnuin hun tawp dawn hnaiah Cristiano Ronaldo goal thun hmangin hnehna an chang.
Scotland hian Portugal lakah bul an tan tha viau a, Scot McTomminay chuan inkhel tan atanga minute 7-na lekah hmahruaina goal a thun nghal. McTomminay goal thun hi hun rei tak chhung an sut thei lova, hnufual zawk ni chungin chawlhlawk an hmang hial. Hun rei tak si an phurh hnuin Portugal tan hian Bruno Fernandes chuan minute 54-naah goal thunin an si phurh a sut. Bruno Fernandes goal thun hnuin goal a luh belh thei lo ngar ngar a, an inhnehtawk mai a rinawm hman. Hun pawimawha mamawh chhanna ni thin Cristiano Ronaldo chu bench atangin a lut a, minute 88-naah Ronaldo hian hma an hruai letna goal thunin Portugal a chakpui zui ta a ni.
Player ropui Ronaldo hian club leh ram tan goal 901 a thun tling chiah a, pen khata goal 1000 a hnaih lehzual a. Goal 1000 thun tling turin goal 99 a la mamawh.
Portugal chak rual hian an khelh hmasak bera chak lo Croatia chuan minute 52-naa Luka Modric goal thun hmangin hnehna an chang a, point thum an hmu ve bawk.