September 9, Thawhtan zan khan UEFA Nations League khelh chhunzawm a ni a, League A-a inkhelah Italy in hnehna an chang nawn leh. Italy in Israel an hneh rualin team lian France pawhin Belgium an hneh ve bawk.
League A, Group 2-a an match hmasa berah Italy hian Mimualah France an lehthal a, team lian lakah point thum hlu tak an hmu. Nations League-ah bul an tan that vangin an phur a, an match hnihnaah khingpui nem zawk neiin Israel an chhawn. Indo hmachhawn mek an nih vangin Israel hian an mualah an khel thei lova, Italy nen hian tualdawih khelmual Bozsik Aréna, Budapest, Hungary-ah an inhmachhawn a ngai. Hungary ramah khel chhe lem lo viau mah se si hnih faiin an khingpui Italy an ngam lo.
Israel an hmachhawn tum hian Italy tan Davide Frattesi chuan minute 38-naah hmahruaina goal a thun. Israel lakah ball chang tam zawk leh hlauhawm siam tak zawk ni reng mah se Italy hian a hmawr an bawk fuh hleithei lova, goal thun an harsat. Hun tha nei tam zawk ni chungin goal an thun belh thei lo va, Frattesi goal thun hmanga hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Israel hi Italy lakah beisei phak bakin an khel tha a, an tang thei viau. Inkhel hmuhnawm takah Italy chu che fuh hmasa zawkah an tang nawn leh a, minute 62-naah Moise Kean chuan goal thunin an hmahruaina a tizau. Si hnih fai ngawta hma an hruai vangin Italy hian nuamsa takin hnehna an chang tura ngaih a ni a, point thum an hmu chiang tawh ang hiala ngaih a ni.
Football a ram ropui Italy lakah si hnih faiin hnufual tawh mah se indona mual hnam huaisen leh ral rel thiam Israel in khelmualah an huaisenzia an lantir. Italy lakah beidawng hauh lovin an intlan a, tlawm an pumpelh teuh hle. Israel tan hian Mohammad Abu Fani chuan minute 90-naah goal thunin an si phurh a sut. Abu Fani goal thun vangin Israel in inrintawkna sang zawk an nei thar a, Italy lakah point hmuh ngei tumin tan an khawh. An si phurh sut zawh tum viau mah se Israel hian hun tawp thlengin goal an thun belh thei lova, Italy lakah an tlawm zui ta a ni.
- France an chak
League A, Group 2-a inkhel dangah team lian pahnih France leh Belgium te an inhmachhawn a, France in an mualah si hnih faiin hnehna an chang.
France hian Nations League season thara an match hmasa berah an mikhual Italy an hneh lova, an mualah point an hmu zo lo. Parc de Princes-ah Italy hneh lova tlawm France hian Groupama Stadium, Lyon-a an mikhual Belgium lakah an khel tha viau a, chak phu zawk an ni. France tan hian Randal Kolo Muani chuan minute 29-naah hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah France an khel tha zui viau a, goal an thun belh leh thuai. Paris St-Germain forward Ousmane Dembélé chuan minute 57-naah France goal hnihna a thun a, an hmahruaiana a tizau. Belgium hian an si phurh sut tumin tan khawh chiam mah se hun tawp thlengin goal an thun thei lova, France lakah an tlawm zui ta a ni.
League-a Group 2 a mi ten vawi hnih theuh an khel ta a, France leh Israel laka chak Italy in point ruk hmuin hma an hruai a. France leh Belgium ten poin thum ve ve an hmu tawh a. League B atanga kaisang Israel in point an la hmu ve lo thung.
- Odegaard a inhliam
League B lama inkhelah Norway chuan hun tawp dawn hnaiah Erling Haaland goal thun hmangin Austria an hneh a, point thum an hmu. Austria an hneh tum hian Norway player pawimawh Martin Odegaard chuan hliam a tuar a, mittui nen khelmual a chhuahsan. Arsenal captain Odegaard hliam hi engtiang chiaha na nge tih hriat la ni lo mah se kar tawp London derby an khelh hunah Arsenal tan a inlan thei lo tura ngaih a ni thung.
Norway in Austria an mikhual tum hian Norway tan Felix Horn Myhre chuan minute 9-na lekah hmahruaina goal a thun. Hma taka an goal chhuah hi Marcel Sabitzer chuan minute 37-naah goal thunin Austria si phurh a sut. Hun rei tak chhung goal a luh belh theih loh hnuin EPL season thara goal 7 zet thun tawh Haaland chuan minute 80-naah hma an hruai nawn lehna goal a thun a. Haaland goal thun hmang hian an chak zui ta a ni.