Nimin khan Environment, Forests & Climate Change Department chuan ramngaw leh nungcha te humhalhna kawnga nunna chan ta te hriatrengna ni ‘National Forest Martyrs Day’ chu State Forest Training Institute, Bethlehem Vengthlang-ah Lalthansanga, Minister, EF&CC Department leh AK Biswal, Principal Chief Conservator of Forests hovin an hmang.
He hunah hian EF&CC Department chuan an thawhpui te duty laia boral mi 12 – Lalzawmliana, Wildlife Guard, Dampa Tiger Reserve; Lalsiamliana, Forester, Durtlang; Lalnunzira, Forester, College Veng; R.L Zoliana, Tuikual South; Zatluanga, Wildlife Guard, Darlawn; K. Lallawmkima, Forest Guard, Kolasib; Laithansanga, Forest Guard, Khawruhlian; Vanlaltluanga, Deputy Ranger, Kawnpui; B. Rothangliana, Chowkidar, Aizawl Zoo; C. Lalrinkima, Forester, Lunglei; C. Lalengmawia, Forest Guard, Champhai leh Sangkhuma Wildlife Guard Dampa Tiger Reserve te hriatrengna leh an mahni zahna chibai bukna hun an hmang.
National Forest Martyrs Day hi 2013 atang khan September ni 11-ah India ramah hman tan a ni a, September ni 11 hi kum 1730-a Bishnoi hnam mi 363 ten ramngaw an humhalh avanga an lal kuta an thih ni a ni a, hemi hriatreng nan hian September ni 11 hi National Forest Martyrs Day atan kum tin hman thin a ni.